Соторутааҕыта Уус Алдан улууһун Чараҥ орто оскуолатыгар Мүрү 1 №-дээх орто оскуолатын учуутала Ульяна Николаевна Румянцева тэрийиитинэн V-VII кылаастарга биология чемпионата ыытыллыбыта. Бу күрэххэ алаас иһинээҕи оскуолалар хамаандалара кыттыбыттара.
Блиц-турнир диэн бастакы түһүмэххэ хамаандалар мүнүүтэ иһигэр боппуруостарга эппиэттээбиттэрэ. Ол кэннэ Кыһыл кинигэ туһунан билиибитин тургутан, таайбараҥ таайыытыгар күрэхтэспиппит. Онтон “Таай” диэн түһүмэҕи ааспыппыт. Онно хамаандалар уочаратынан тахсан, үстүү ыйытыыга эппиэттээбиттэрэ. «ООПТ”, “Зоология”, “Ботаника”, “Таабырыннар” диэн 5, 10, 12, 15 диэн очукуолаах боппуруостары талыахха сөп этэ. Салгыы хамаанда хапытааннара экология садаачаларын суоттаабыппыт да, хомойуох иһин, соччо сатаабатахпыт. Логиканы сайыннарыы түһүмэҕэр икки ыйытыыны биэрбиттэрэ (сөптөөх хоруй иһин – 10 очукуо). Манна биһиги “Муох тоҕо хоту үүнэрий?” диэн ыйытыыга сөптөөх хоруйу биэрэн, үһүс миэстэҕэ тахсыбыппыт. Ону таһынан “Хара дьааһык” иһигэр туох баарын таайыы түһүмэҕэ эмиэ бэрт сэргэх этэ.
Бу курдук Экология сылын түмүктүүр чемпионат 1-кы түһүмэҕэ олус туһалаахтык ааста. Биһиги, иккис түһүмэххэ киирсээри, бэлэмнэнэ сылдьабыт.
Айталана ПУХОВА.
Майаҕас, Уус Алдан.