Алиса Аргунова Дьокуускай 2 №-дээх национальнай политехническай орто оскуолатыгар IV кылааска үөрэнэр. Кыысчаан спордунан дьарыктанар, үҥкүүнэн үлүһүйэр, ыллыырын сөбүлүүр.
Алиса “Бриллиантовые нотки-2016” 1 степеннээх лауреата, ырыа айааччы Надежда Макарова “Көмүс ыллык” куонкуруһун лауреата. Ону таһынан Москва куоракка ыытыллыбыт “Аан дойду талааннара” норуоттар икки ардыларынааҕы фестиваль-куонкуруска лауреат үрдүк аатын ылары ситиспитэ.
Кыысчаан “Оҥоойукка” диэн сөбүлээн толорор ырыатыгар (К. Туйаарыскай тыла, Н. Макарова мелодията) килиип устубуттара, бу күһүн көрөөччү киэҥ эйгэтигэр, күөх экраҥҥа тахсан, дьон сэҥээриитин ылбыта. Онон минньигэс мичээрдээх, чуораанчыктыы чугдаарар куоластаах кыыһы көрөн билэр буолуохтааххыт. Ырыаны таптыырга, ис сүрэхтэн ыллыырга, сыанаҕа тутта-хапта сылдьарга, сахалыы саймаарыччы саҥарарга уус-уран салайааччы, СӨ култууратын туйгуна, биллиилээх ырыаһыт Елена Старостина-Хотун Арылы үөрэтэр-такайар. Аргуновтар дьиэ кэргэн киниэхэ махталлара муҥура суох.
Ырыа аргыстаах Алиса художественнай гимнастиканан утумнаахтык дьарыктанар. Ситиһиитэ да үгүс. Ол курдук, Москва уобалаһын Долгопруднай, Озеры куораттарыгар кыһыл көмүс мэтээл хаһаайката буолан, кыайыы кынаттанан кэлбитэ.
Ийэ, аҕа эрэлэ, эбээ, эһээ үөрүүтэ
Алиса Ираида Федоровна, Николай Андреевич Аргуновтар дьиэ кэргэннэригэр күүтүүлээх кыыс. Төрөппүттэрэ күҥҥэ көрдөрбүт көмүс чыычаахтарын бары өттүнэн сайыннарарга ис сүрэхтэриттэн кыһаллаллар. Ыал улахан оҕото буолан, биэс саастаах быраатын Андрейы көрөр-харайар. Эдьиийэ оскуолаттан кэллэҕинэ, күн сандаарыччы тыкпытыныы, кырачаан киһи үөрэн, сирэйдиин-харахтыын сырдыы, сэргэхсийэ түһэр.
Эйэҕэс эбэлэрэ Антонина Николаевна уонна Розалия Ивановна, эһэтэ Федор Степанович сиэннэрин ситиһиитинэн үөрүүлэрэ үксүүр. Алиса сайын аайы кэрэ айылҕалаах Сунтаар Күүкэйигэр олорор эбэтигэр, эһэтигэр күндү ыалдьыт буолан тиийэр. Күөх хонуу устун сүүрэкэлээн, сир астаан, көлүччэҕэ күөлэһийэ сөтүөлээн, сынньалаҥын бэркэ атаарар.
Алисаҕа туйгун үөрэҕи, майгылаах мааныта, киһи киһитэ, үлэһит үтүөкэнэ буола улаатарыгар баҕара хаалабыт. Сүрэҕиҥ сөбүлүүр дьарыктара ситиһиигэ сирдээтиннэр!
Кыра хаһаайка сүбэлиир
Алиса дьиэтигэр ийэтиниин үөрэ-көтө ас астыырын туохтааҕар да ордорор. Чугас дьонун минньигэс пиццанан, бэчиэнньэнэн, кексинэн күндүлүүр. Ону сурунан иһэр дьоҕус блокноттаах. Эһиэхэ, “Кэскил” ааҕааччыларыгар анаан, Алиса бэчиэнньэ уонна кекс ырысыабын үллэстэр.
Бэчиэнньэ
Онно наада:
— 150 г маргарин;
— 150 г саахар;
— 300 г бурдук;
— 1 сымыыт;
— 1 кыра ньуоска суода.
Барытын холбоон, булкуйан, тиэстэбитин мэһийэбит. Бэйэбит сөбүлүүрбүтүнэн хайдах баҕарар быһыылаах бэчиэнньэлэри оҥоробут. Духуопкаҕа буһарабыт.
Кекс
Онно наада:
— кефир;
— 2-3 сымыыт;
— 1 ыстакаан саахар;
— 1 кыра ньуоска суода.
Барытын холбоон, булкуйан, тиэстэбитин мэһийэбит. Кекс буһарар анал халыыптарга кутан, духуопкаҕа буһарабыт. Сойбутун кэннэ киэргэтэбит.
Айыына КСЕНОФОНТОВА.