Ыам ыйын 19 күнүгэр биһиги Улахан Ааммытыгар 4-7 кылаастарга Пионерия тэриллибитэ 100 сылын көрсө улахан пионерскай сбор буолбута.
Онно урукку пионердыы сылдьыбыт нэһилиэкпит эбээлэрэ кэлбиттэрэ. Бары этэрээтинэн туран пионердар өрөгөй ырыаларын ыллаабыппыт. Ол кэнниттэн 2-с Малдьаҕар орто оскуолатын дириэктэрэ Сысоев Григорий Григорьевич кэлэн, бары пионердары эҕэрдэлээбитэ. Ол кэннэ 4-с кылаас 15 үөрэнээччитэ пионерга киирэр долгутуулаах түгэннэрэ буолбута. Бары андаҕар тыл эппиттэрэ. Биһиги 5-7 кылаас пионердара бары пионерскай хаалтыспытын кэтэн туран, кинилэр пионерга киирэллэрин көрбүппүт.
Бу кэннэ мустубут дьону барыларын музейга оҥоһуллубут пионер муннугун көрүүгэ ыҥырбыттара. Музейга хаартыскаҕа түспүтүм, бэйэм эмиэ хаартыскаҕа түһүөн баҕалаахтары түһэрбитим. И.В.Сталин хартыынатын аттыгар түспүтүм.
Ити кэнниттэн мин маннык түмүккэ кэллим: пионер буолар үчүгэй эбит. Саҥаны билэр, араас дьону кытта кэпсэтэр, кинилэр санааларын истэр, историческай маллары илэ хараххынан көрөр интэриэһинэй эбит.
Аман ЕРЕМЕЕВ,
М.Е. Васильева аатынан 2-с Малдьаҕар
орто оскуолатын 6 кылааһын үөрэнээччитэ.