Оҕолоор, муус маҥан, ып ыраас саҥа хаарбыт дьэ түстэ. Ойуурга кыыллар уйаларын оҥостоллор, кыһын устата сиир хаһаас астарын хаһааналлар. Биһиги эмиэ сылаас таҥаспытын, аһыыр аспытын бэлэмнэнэбит. Ити курдук, төрөөбүт айылҕабытын дириҥник билэргэ, хамсыыр харамайын, кыылын-көтөрүн үөрэтэргэ куруук дьулуһуохтаахпыт. Кыыллар бары бу – биһиги киэн туттар баайбыт. Киһи айылҕа оҕото буоларын умнуман, кыыллары таптааҥ, харыстаан, доҕордоһун!
Галина Власьевна Ильина, Оҕо ааҕыытын киинэ, бибилэтиэкэр, Дьокуускай.
Александр Николаев
Тииҥ
Тиит дьиэлээх
Тииҥ диэммин,
Тииттэн тииккэ ыстанабын,
Тииттэринэн айанныыбын.
Тиит дьиэлээх
Тииҥ диэммин,
Эриэхэнэн эбиэттиибин,
Тиит туорааҕын тиниктиибин.
Тиит дьиэлээх
Тииҥ диэммин,
Сайын саһыл өҥнөнөбүн,
Күһүн көп күөх түүлэнэбин.
Тиит дьиэлээх
Тииҥ диэммин,
Сааһыттары хаамтарабын,
Булчуттары угуйабын.
Петр Одорусов
Тииҥ
Сиир тэллэйбин таһааран
Лабааларга ыйыыбын,
Туораахтартан арааран
Сиэмэлэрин ыстыыбын.
Петр Одорусов
Тайах
Саха сирин ойуурун
Саамай бөдөҥ кыылабын.
Халдьаайытын, хотоолун
Хаһаайына буолабын.
Иннокентий Эртюков
Тайах
Ууна сылдьар улахан
Ураа-лаҥкыр муостаах,
Килбик-сэмэй, лахан,
Кини баһаам күүстээх.
Кини аата – тайах,
Бачыыҥката туйах.
Капитолина Семенова
Тайах
Айылҕа маанылаах кыыла
Аар тайҕа сүдү кыыла
Аарыма улахан кыыл
Тайах эбит, оҕолоор.
Сирилэс тыаллыын сиэттиһэн,
Сиһинэн-тыанан сиэлэр,
Сүрдээх сэрэх кыыл
Тайах эбит, оҕолоор.
Бэрт кыраһыабай муостаах,
Бэрт чочуонай атахтардаах,
Бэрт сыыдам айаннаах,
Тайах эбит, оҕолоор.
