Балаҕан ыйын 13 күнүгэр СӨ Үүнэр көлүөнэ пуондата уонна «Тутуу дириэксийэтэ» өрөспүүбүлүкэҕэ суолталаах эбийиэги тутар туһунан сөбүлэҥҥэ илии баттастылар.
Үөрүүлээх тэрээһиҥҥэ СӨ Бырабыыталыстыбатын бэрэссэдээтэлэ Сергей Местников, СӨ сүрүн архитектора Ирина Алексеева, СӨ Үүнэр көлүөнэ пуондатын сүрүннүүр дириэктэрэ Владимир Егоров, Дьокуускай куорат сүрүн архитектора Семен Сергеев, «Тутуу дириэксийэтэ» тэрилтэ сүрүннүүр дириэктэрэ Сергей Никитин кыттыыны ыллылар.
Биһиги Сахабыт сиригэр суох баараҕай бырайыак Ил Дархан Айсен Николаев этиитинэн уонна дьаһалынан олоххо киирэр. Тутуу уонна хааччыйыы боппуруоһун СӨ Үүнэр көлүөнэ пуондата иилиир-саҕалыыр.
«Билиҥҥи туругунан, бырайыактааһын уонна судаарыстыбаннай экспертизэ түмүктэннэ, уопсай суумата балтараа миллиард кэриҥэ солкуобай, үбүлээһинин сыл аайы өрөспүүбүлүкэҕэ социальнай эбийиэктэри тутууну өйүүр «АЛРОСА» хампаанньа уйунуоҕа», — диэн тоһоҕолоон бэлиэтээтэ Сергей Местников.
2019 сыллаахха архитектурнай кэнсиэпсийэни уонна эбийиэк сирин генеральнай былаанын оҥорууга Бүтүн Россиятааҕы куонкурус кыайыылааҕынан «ATRIUM/Восток+» консорциум ааттаммыта. Бу күрэскэ Арассыыйаттан эрэ буолбакка, тас дойдуттан кытары кыттыыны ылбыттара. Барыта 180-тан тахса үлэ киирбититтэн, «ATRIUM/Восток+» бастыҥынан ааттаммыта. Быһа сибээскэ Москва куораттан сүрүн архитектор, тэрийээччи Антон Надточий быһа сибээскэ холбоно сырытта.
Паарка Саха судаарыстыбаннай университетыттан чугас, киин сиргэ — Петровскай-Каландаришвили уулуссалар быһа охсуһууларыгар баар 2,4 га иэннээх сиргэ тутуллуоҕа. 2025 сылга диэри үлэҕэ киирэрэ былааннанар. Бу Саха сирин айылҕатын уратытын учуоттуур бастакы аһаҕас сир буолуоҕа. Бырайыак үүнэр көлүөнэ көдьүүстээх уонна айымньылаах сынньалаҥар, өй-санаа, духуобунай уонна эт-хаан өттүнэн сайдарыгар усулуобуйаны тэрийиигэ туһуланар. Манна скейт-былаһаакка, атриум, оонньуур, чэбдигирэр, сынньанар сирдэр, араас тэрээһиннэри ыытар коворкинг-кииннэрэ, оҕону үөрэтэр былаһааккалар о.д.а. баар буолуохтара. Бу баараҕай тутуу барыта 3 этээстэн туруоҕа, бастакы этээһэ көтөҕүүлээх буолара былааннанар. Уонна суолтаааҕа диэн бу улахан эдэр көлүөнэ паарката сылы быһа тохтоло суох үлэлиирэ былааннанар.
Маны таһынан Үүнэр көлүөнэ пааркатын бырайыага архитектура, бырайыактааһын, тутуу салаатыгар кэккэ кэскиллээх наҕараадалары ылбыта бэлиэтэннэ. Ол иһигэр эбийиэк Architectural Review Future Project Awards 2021 норуоттар икки ардыларынааҕы «Общественное и гражданское строительство» анал аат кыайыылааҕынан буолбута.
СӨ Үүнэр көлүөнэ пуондатын сүрүн дириэктэрэ Владимир Егоров биһиги ыйытыыбытыгар, сүрүннээн пааркаҕа аат ылыллыбытын туһунан маннык диэн эппиэттээтэ. Сиһилии видеоҕа көрүҥ.
Петр Матвеев хаартыскалара.