Оҕо киинэтин фестивала
Атырдьах ыйын 27—Россия киинэтин күнэ. Ити бэлиэ күнүнэн Дьокуускайга 2 №-дээх оскуолаҕа оҕо киинэтин өрөспүүбүлүкэтээҕи фестивала ыытыллар. Сүрүн тэрийээччилэр: «Юные якутяне» өрөспүүбүлүкэтээҕи тирэх киин уонна «Алгысфильм» устуудьуйа. Сиһилии «Алгысфильм» устуудьуйа режиссера, продюсера Толлуман Барашков кэпсиир:
—«Цветок севера» диэн оҕо киинэтин өрөспүүбүлүкэтээҕи фестивалын быйыл иккис төгүл көҕүлүүбүт, тэрийэбит. Былырыын фестивальбыт эмиэ атырдьах ыйын 27 күнүгэр, Дьокуускай куораттааҕы классическай гимназияҕа буолбута. Өрөспүүбүлүкэ араас улуустарыттан, Дьааҥыттан тиийэ элбэх устуудьуйа кыттыбыта. Быйыл эмиэ оҕолору куонкуруска кыттыҥ диэн ыҥырабыт, сюжеттары, кылгас, улахан кээмэйдээх киинэлэри, клиптэри, мультфильмнары күүтэбит. Биир киинэ 3 мүнүүтэттэн саҕалаан, 60 мүнүүтэҕэ тиийэ уһуннаах буолуон сөп. Хас биирдии киинэни avi эбэтэр mpeg киэпкэ устан ыытыахтааххыт. 8961 869 1740 төлөпүөнүнэн Василиса Львовна Васильеваны кытары сарсыарда 10 чаастан 14 чааска диэри билсиҥ.
Эһиэхэ анаан
—«Алгысфильм» оҕо киинэтинэн дьарыктаммыта төрдүс сылыгар барда. Былыырын, быйыл «Цветок тундры», «Сон пионера» диэн киинэлэри таһаардыбыт. Ол иннинэ «Мэтээл», «Отон» диэни бэлэмнээбиппит. Оҕолорго бэйэбит күүспүтүнэн сайыҥҥы лааҕыры үлэлэтэбит. Үөрэх дьылын кэмигэр 2 №-дээх оскуолаҕа тирэнэн куруһуок үлэлэтэбит. Оҕолор киинэ оҥоһуллар «ис куукунатын» толору билсэллэр, бэйэлэрэ уһуллаллар уонна усталлар. Түгэнинэн туһанан, дириэктэр Алексей Климентьевич Семеновка ис сүрэхпититтэн махтанабыт.
Киинэ үөрэҕэр
—Саамай үөрэрим диэн, куруһуокпар дьарыктаммыт Кристина Илларионова бэйэтэ баҕаран туран, былырыын Москваҕа ВГИК-кэ туттарсан киирбитэ. Ситиһиилээхтик үөрэнэ сылдьар, 1-кы кууруһу бүтэрдэ. Үөрэҕин сөбүлүүр. Бу күннэргэ биир иитиллээччибит, Дьокуускай 2 №-дээх оскуолатын туйгуннук үөрэнэн бүтэрбит Урсун Бурнашев эмиэ ВГИК-кэ туттарса сылдьар. Биһиги үлэбит түмүктээх буоларыттан үөрэбит.
Хайдах буолуохтааҕый?
—Оҕо киинэтигэр болҕомтону ууруохха наада. Киинэ сүрүн санаата, ис хоһооно иитэр-үөрэтэр суолталаах, хайысхалаах буолуохтаах. Киинэни устуу дьиҥэ, сүрдээх түбүктээх, ыарахан. Маныаха оҕо киинэтэ судаарыстыбаттан үчүгэйдик үбүлэниэхтээх. Биһиги «Кэскил», «Юность Севера» хаһыаттары кытары хаһыс да сылын бииргэ үлэлиибит, алтыһабыт. Ол курдук, 2015 с. бүтүүтэ эһиги хаһыаттаргытыгар анаан реклама оҥорбуппут. Онно Саха гимназията, Дьокуускай 2 №-дээх оскуолатын үөрэнээччилэрэ уһуллубуттара. Онтубут «Саха» НКИХ, «Вести-Саха» ханаалларга көстүбүтэ. Инникитин «Кэскил» редакциятын кытары куонкурус биллэриэхпит. Эһиги хаһыаккытыгар араас үчүгэй айымньылар: кэпсээннэр, остуоруйалар бэчээттэнэллэр дии. Дьэ ол айымньыларынан оҕолорго сценарий суруйуутугар куонкурус биллэриэхпитин баҕарабыт. Бастыҥ үлэҕэ олоҕуран «Алгысфильм» саҥа киинэлэри устуо этэ. Оҕо киинэтэ—төрөөбүт саҥабыт, тылбыт үйэтийэр эйгэтэ.
«Алгысфильм» уонна К-РОР
Быйыл биһиги Соҕуруу Кэриэйэттэн икки бөлөҕү ыҥыран, Дьокуускайга улахан кэнсиэртэри тэрийдибит. Кулун тутарга уолаттар «Double Eight», от ыйыгар «U-RECA» кыргыттар бөлөхтөрүн ыалдьыттаппыппыт. Кинилэр кэнсиэртэригэр уонна маастар-кылаастарыгар, автограф-сессияларыгар сүрдээх элбэх оҕо, ыччат дуоһуйа сылдьыбыта. Аны, «U-RECA» бөлөх биир ырыатыгар режиссер Константин Тимофеев клип уһулла. Бу клипкэ элбэх оҕо кытынна. Кинилэр истэригэр «Берегиня» оҕо дьиэтин иитиллээччилэрэ, «Харысхал» пуондаттан инбэлиит оҕолор эмиэ уһулуннулар. Босхо. Ити тэрээһиннэри биһиги оҕолор Кэриэйэ аныгы муусукатын сэҥээрэллэрин иһин, тас дойду таһымнаах бөлөхтөрүн илэ көрдүннэр диэн сыаллаах тэрийбиппит. Онон сотору норуоттар икки ардыларынааҕы клип «Саха» НКИХ, «ЯТВ»-га сүрэхтэниэ, «ютуб»-ка киириэ. Кэтэһиҥ!
Кэриэйэҕэ
—Быйыл мин Соҕуруу Кэриэйэҕэ бара сырыттым. К-РОР устуудьуйаларын көрдүм-иһиттим, билистим. Бу бэйэтэ туспа индустрия, харчы эргийэр киинэ. Ыраатта, устудьуоннуу сылдьан аан бастаан билсибитим, Кэриэйэ поп-муусукатын. Сөҕөр этим, хайдах маннык сайдыылаахтарый диэн.
Болҕойуҥ, куонкурус!!!
—Бары эдэр ааҕааччыларга үчүгэй сонуннаахпын: балаҕан ыйын 19-26 күннэригэр Дьокуускайга… «Double Eight» бөлөх өссө төгүл кэлэр. Онон К-РОР сүгүрүйээччилэрэ ити кэми күүтэ, бэлэмнэнэ сылдьыҥ. Биир нэдиэлэ устата «Double Eight» кэнсиэрэ уонна маастар-кылаастара ыытыллыахтара. Тэрээһин үөрэх кэмигэр ыытылларынан сибээстээн, биһиги үөрэх хаамыытын толору учуоттаатыбыт. Ол курдук, бастакы сменаҕа үөрэнэр оҕолор эбиэт кэннинээҕи чаастарга, оттон иккистэр сарсыардааҥҥы өттүгэр сылдьыахтара. Оччоҕо ким да үөрэҕин көтүппэт.
Билигин «Кэскил», «Юность Севера» хаһыат ааҕааччыларыгар уруһуй куонкуруһун биллэрэбит. Эһиги ити бөлөх уолаттарын уруһуйдаан, «Кэскил» хаһыат редакциятыгар балаҕан ыйын ортотугар диэри 216 кэб. тиксэриэхтээххит.
Ити бөлөҕү билбэтэх, көрбөтөх буоллаххытына, «Кэскил» хаһыат быйылгы, кулун тутар 21 күнүнээҕи нүөмэрин булан ааҕыҥ, көрүҥ. Уруһуй куонкуруһугар кыттыан баҕалаахтар субу күннэргэ хаалбыт үс-түөрт ыйга «Кэскил» хаһыакка суруйтара охсоҕут уонна уруһуйгутун кытары квитанцияҕытын уган ыытаҕыт.
10 кыайыылаахха умнуллубат бэлэх—«Double Eight» бөлөх биир күннээх маастар-кылааһыгар буор-босхо ыҥырыылар!
Ааккытын-суолгутун, төлөпүөҥҥүтүн толору ыйаргыт булгуччулаах.
Уруһуй куонкуруһун туһунан ыйыталаһар төлөпүөҥҥүт: 8914 2201780. Ким Кэриэйэ бөлөҕүн кытары алтыһар, көрсөр чиэскэ тиксэр эбитий? Кытаатыҥ оҕолоор!
Жанна Леонтьева.