Оҕолоор, эһиги сыанаҕа тахсаары эбэтэр ханна эмит кытта тахсаары туран төһө долгуйаҕытый? «Сыанаттан куттаныы» диэн бу киһи биир «фобията», ол аата куттала эбит. Киһи элбэх дьон ортотугар тахсарын куттала «социальнай куттал» диэн ааттанар. Ханна эмит тахсаары туран сүрэҕин күүскэ тэбэр, куолаһыҥ салыбырыыр, этиҥ барыта уу-көлөһүн буолар, ону таһынан кыратык хотуолаары гыммыт курдук буолаҕыҥ, иһиҥ ыалдьар — бу барыта сыанаттан куттал бэлиэлэрэ. Уйулҕа үлэһиттэрэ этэллэринэн дьон 95 % — бары сыанаттан, элбэх киһи иннигэр тахсартан долгуйар уонна куттанар эбит.
Онтон оҕолоор, ону хайдах аһарынаҕытый? Куттанан куотан хаалбат буоллаххыт. Эһиги, баҕар, Дьокуускай болуоссатыгар оонньуур скрипачка Елена Березовскаяны көрөн аһардыбыккыт буолуо, кини этэринэн, эмиэ оҕо эрдэҕиттэн сыанаттан олус куттанар эбит. 7 сааһыттан музыка оскуолатыттан саҕалаан кини элбэх кэнсиэрдэргэ, күрэстэргэ кыттан кэлбит. Елена этэринэн, ол 7 саастаах кыыс сыанаттан наһаа долгуйар эбит. Онтон кинини биир ньымаҕа үөрэппиттэр, кыысчаан эрдэттэн сыанаттан кутталын таһаарар буолбут. Ол аата тахсаары туран, туох баар долгуйуутун сыана кэтэҕэр хаалларар буолбут. Онтон оонньуу тахсарыгар долгуйуута син сыыйа-баайа ааһан бэйэтигэр эрэллээх тахсара элбээбит. «Аны сыл-хонук аастаҕын аайы скрипката суох таҕыстахпына соҕотохсуйабын, скрипкам миэхэ бэйэбэр эрэллээх буоларбар наһаа көмөлөһөр», — диир билигин номнуо дьон биһирэбилин ылбыт музыкант Елена Березовская.
Билигин скрипачка Елена Березовская оонньуурун Ленин болуоссатыгар от ыйын 15 күнүгэр, атырдьах ыйын 1, 8 күннэригэр киэһээ 17 чаастан көрүөххэ-истиэххэ сөп.
Онон оҕолоор, сыанаҕа тахсартан куттаммат буолуҥ уонна элбэхтик бэлэмнэммит киһи долгуйара кыра буолар. Бэйэҕитигэр хаһан баҕарар эрэллээх буолуҥ!
Ситиһиилээх күнү!
Суруйда Анна СЛЕПЦОВА.