В.В.Алексеев аатынан Мүрүтээҕи Уолан гимназия саха, нуучча, омук тылларын учууталлара уол оҕо саҥарар дьоҕурун сайыннарар сыаллаах IV-c улуустааҕы, I-кы өрөспүүбүлүкэтээҕи аман өс күрэҕин тэрийэн ыыттылар.
Манна V-X кылааска үөрэнэр уолаттар саха, нуучча, омук тылларынан бэйэлэрин санааларын, толкуйдарын этэн күөн көрүстүлэр. Быйыл Саха сирин улуустарын хабар сыал-сорук туруорунан, бастакы өрөспүүбүлүкэтээҕи тэрээһиммит үрдүк таһымҥа куйаар ситиминэн буолла. Ол курдук уопсайа 43 уол кыттыыны ылла: Дьокуускай куораттан (Дьокуускай куорат национальна гимназията, «Айыы кыһата» национальнай гимназия), Чурапчыттан, Амматтан, Уус Алдантан (Мүрү 1 №-дээх, 2 №-дээх орто оскуолалара, Мүрүтээҕи Уолан гимназия, Чэриктэй, Өнөр орто оскуолалара). Уолаттар бары олус кыһаллан бэлэмнэммиттэр. Уопсай түмүккэ хас биирдии тылга миэстэлэр уонна анал ааттар туттарылыннылар. Онтон үс тылынан саҥарбыт-иҥэрбит уолаттар икки ардыларыгар муҥутуур кыайыылааҕынан V-VI кылаастарга Юрий Никулин (В.В. Алексеев аатынан Мүрүтээҕи Уолан гимназия), VII-VIII кылаастарга Михаил Лукачевскай (Өнөр орто оскуолата), IX-X кылаастарга Уран Александров (Мүрүтээҕи Уолан гимназия).
Ити курдук, “Тылгынан кыай!” бырайыакка уолаттар кыттаннар олус үөрдүлэр, санааларын сайа этэннэр дуоһуйдулар, толлубакка дьон иннигэр саҥара үөрэннилэр. Бары кыттыбыт уолаттарбытыгар уонна биһиги ыҥырыыбытын ылынан сөбүлэспит дьүүллүүр сүбэҕэ махталбытын тиэрдэбит. Бырайыакпыт өссө сайдан, эһиилги үөрэх дьылыгар өссө элбэх кыттааччылары күүтэбит!
Коля Турантаев,
XI кылаас,
Мүрүтээҕи Уолан гимназия.