Мэҥэ Хаҥалас улууһугар сыллата ыытыллар Спорт уонна култуураҕа аналлаах эстафета быыстапка олус элбэх талааннары арыйар, нэһилиэктэр олохторун сүрдээҕин сэргэхситэр. Ол курдук, култуура эстафетатын быыстапкатыгар олохтоох дьон бэйэлэрэ илиилэринэн оҥорон таһаарбыт оҥоһуктарын көрүү-истии куруутун сэргэх буолар. Саҥаттан саҥа талааннаах дьон сылын ахсын бэйэлэрин оҥоһуктарын киэҥ эйгэҕэ көрдөрөллөр. Матта бөһүөлэгэ тарбаҕар талааннаах, ыллам ырыалаах, хомоҕой хоһоонноох дьонунан-сэргэтинэн биллэр. 
Ол курдук, бу куукулалар полимернай туойтан оҥоһуллубуттар. Уһуннара 17-18 см. Толкуйдаан таһаарбыт маастар, нэһилиэк бибилэтиэкэрэ Альбина Андросова. Куукулалар илиилэрэ, атахтара хамсыыр, араас балаһыанньаҕа олордуохха да туруоруохха да сөп. Саппыкылара, бэл диэтэр, кырачаан тимэхтэрэ барыта полимернай туойтан оҥоһуллубут. 
Аркадий Новиков аатырар, саха дьоно бары таптаан көрөр артыыһа этэ. Кини хамаандата Мэҥэ Хаҥалас биир саамай чаҕылхай, өйгө хатанан хаалар артыыстара, дьоно буолаллар. Онон Альбина саамай астынар артыыстарын мөссүөннэрин үйэлэргэ үйэтитэн дьиҥ чахчы талаанынан бар дьону сөхтөрдө.
Нюргуяна Захарова