Биһиги дьиэбит таһыгар элбэх чыычаах мустар. Кинилэр сылааска эбэтэр ардахтаах күҥҥэ дьиэбит аттыгар кэлэн саһаллар, сөрүүкүүллэр. Ол иһин мин ийэбин кытта чыычаах уйатын кыһаллан оҥорон, маска ыйаабыппыт. Бу уйаҕа элбэх чыычаах төрүө-үөскүө, күн аайы чобуо ырыатынан, кэрэ көстүүтүнэн үөрдэ туруо, үүнээйилэрбитин үөннэртэн көмүскүө.
Сарсыарда оскуолаҕа барарбар ырыа-тойук, кынат тыаһа элбээбит. Күн аайы чыычаахтары кэтиибин. Онно көрдөхпүнэ кинилэр наар ыллыыр буолбатахтар эбит. Сороҕор ас былдьаһан чыбыгыраһаллар, айдаарсаллар, кынаттарын ыраастаналлар, сорохтор куттанан куоталлар, сылаас күҥҥэ айахтарын атан кэбиһэллэр эбит.
Мин оҥорбут уйабын чыычаахтар наһаа сөбүлээбиттэр уонна ыалдьыттар көрөннөр миигин хайҕыыллар. Чыычаахтарга араас үөннэри хомуйан ууран сиэтэбин.
Оҕолоор, эһиги эмиэ дьиэҕит таһыгар чыычаах уйатын оҥоруҥ. Оччоҕо ардахтан, куйаастан куотан уйаларга киириэхтэрэ, саһыахтара, аһыахтара. Тэлгэһэҕит иһэ барыта чыычаах ырыатынан туолуо. Мин оҥоһуу уйалаах чыычаахтары эрдэ төлөпүөҥҥэ, кинигэ ойуутугар эбэтэр мультикка көрөр этим. Онтон билигин ону наһаа астынабын уонна үөрэбин.
Сергей Огонеров,
V кылаас,
М.Н. Турнин аатынан Тыараһа орто оскуолата.
Таатта.