Мүрү 1-кы №-дээх оскуолата Россия үөрэнээччилэрин бүттүүн хамсааһыныгар 2019 сыл күһүнүгэр киирбитэ. Быйылгы үөрэх дьылыгар X кылаас үөрэнээччитэ Нюргустана Оллонова лиидэринэн талыллан, үлэлии-хамсыы сылдьар. «MyryStar» түмсүү оскуола иһинэн буолар тэрээһиннэри иилээн-саҕалаан ыытар. Ону сэргэ, билиҥҥи кэм ирдэбилинэн, улуустааҕы, өрөспүүбүлүкэтээҕи онлайн тэрээһиннэргэ көхтөөхтүк кыттар.
Нюргустана Оллонова:
– Мин Россия үөрэнээччилэрин бүттүүн хамсааһыныгар сылдьарым үчүгэйэ диэн оҕолору кытта билсэн-көрсөн, элбэх саҥаны билэбин-көрөбүн. Бары тэрээһиннэргэ көхтөөхтүк кыттабыт, бэйэбит тэрийэн ыытабыт. Оҕолор интэриэһинэй, ураты, билиҥҥи кэмҥэ тоҕоостоох санааларын, идеяларын өрө тутан, олоххо киирэригэр үлэлэһэбит. Хас биирдии үөрэнээччи санаатын истэбит, өйүүбүт.
Оҕолор үүнэллэрин-сайдалларын туһугар Сахабыт сирин биллиилээх дьоннорун кытта профориентационнай хайысхалаах көрсүһүүлэри тэрийэн саҕалаатыбыт. Атын оскуолалары кытта үлэлэһэр былааннаахпыт.
Мария Иванова