Алтынньы 30 күнүгэр Билим дьоҕус академиятыгар «Голос Севера: родной язык и цифровые технологии» диэн оҕолорго билим оскуолатын түмүктүүр тэрээһинэ буолла.
Алтынньы 27- 31 күннэригэр Саха Өрөспүүбүлүкэтин Билим дьоҕус академиятын сэргэ Хотугулуу-Илиҥҥи федеральнай университет «Ыччат лабораторията» «Голос Севера: родной язык и цифровые технологии» диэн оҕолорго билим оскуолатын төрөөбүт тылбыт аныгы кэм сайдыытын кытары тэҥҥэ цифровой эйгэҕэ эрэллээхтик хардыылаан иһэригэр тирэх буолар сыаллааах-соруктаах тэриллэн ыытылынна.
Бу оскуолаҕа 31-с оскуола 5 А кылааһын үөрэнээччилэрэ 36 оҕо буолан кытыннылар. Араас тиэкистэри микрофоҥҥа ааҕан, сахалыы кэпсэтэн, 3д-моделированиеҕа үөрэннилэр, оҕолор бэйэлэрэ проект оҥорон көрдүлэр оҥоһуу өй диэн тугун үөрэттилэр, араас ыҥырыылаах ыалдьыттары кытта көрсүстүлэр.
Бүгүҥҥү тэрээһин ыҥырыылаах ыалдьыттарынан буоллулар:
- Билим дьоҕус академиятын ректора, философия билимин доктора Василий Климович Павлов;
- Бу проект салайааччыта, тыл билимин доктора, профессор, М. К. Аммосов аатынан Хотугулуу илиҥҥи федеральнай университет билим уонна инновация департаменын салайааччыта, «Арктика тылларын экологията» Аан дойдутааҕы билим-чинчийэр лабораториятын сүрүн учуонайа Нинель Васильевна Малышева;
- Физика-математика билимин кандидата, «Вычислительные технологии и искусственный интеллект» лаборатория салайааччыта, сүрүн билим үлэһитэ Сергей Павлович Степанов;
- М. К. Аммосов аатынан Хотугулуу илиҥҥи федеральнай университет цифровой уонна технологическай сайдыы проректора Петр Петрович Иванов;
- Дьокуускай куорат 31 нүөмэрдээх оскуолатын дириэктэрэ Саргылана Анатольевна Саргыдаева;
- ГАУ РС(Я) «Сахапечать» генеральнай дириэктэрин солбуйааччы Ольга Ивановна Семенова.
Оҕолор тэрээһини бэйэлэрэ бэлэмнээбит дьүһүйүүлэринэн, ырыаларынан тэрээһини киэргэттилэр. Саҥа саҕаламмыт проект олоххо киирэригэр түмсүүлээх, күүстээх үлэ ыытыллыахтаах, сырдык кэскил саҕыллар, ийэ тыл инникитэ быһаарыллар долгутуулаах түгэнигэр бүгүн меморандум баттанна.
Бу проект РФ билим уонна үөрэҕирии министерствотын «Разработка базовых инструментов голосовых технологий для языков коренных народов Севера» ыччат лабораторияларын программаларын чэрчитинэн ыытылынна. Хотугулуу илиҥҥи федеральнай университет олус улахан конкурска кыайбыт дьоһуннаах проегын иитинэн тэрилиннэ.
keskil14.ru