«Бараммат-хороммот,
Банаардаах сырдыкка,
Баҕабын толорор
Бастыҥныыр доҕорбун», — диэн Амма Аччыгыйа эппитинии, учуутал хас биирдии киһиэхэ кыра эрдэҕиттэн бастыҥ доҕор, иккис Ийэ, чугас атас кэриэтэ. Бастакы учуутал билии киэҥ аартыгар бастакынан киллэрбит, ааҕарга-суоттуурга бастакынан үөрэппит киһи буолар.
Учуутал — кини оскуола биридимиэттэрин эрэ үөрэтэр, биэс-түөрт эрэ сыаналары биэрэр киһи буолбатах, кини олох оскуолатын бүттүүнүн иҥэрэр, киһилии сыһыаҥҥа үөрэтэр, олоххо тапталы уонна дьулууру биэрэр, сырдыкка уонна кэрэҕэ уһуйар күндү киһи.
Бу олоххо учуутал баар буолан, олох сайдар, оттон олох сайдыыта быһаччы науканы, үөрэҕириини кытта ситимнээх. Биһиги аттыбытыгар уһулуччулаах учуонайдар, бүттүүн дойдуну, ону ааһан аан дойдуга тиийэ биллэр үтүө дьон, биллэр артыыстар, аатырар спортсменнар бааллар, кинилэр суолларыгар учуутал эмиэ улахан оруоллаах диэн чопчу этэбит.
Биһиги, сахалар, чулуу учууталларга үөрэммит, кинилэр үөрэхтэрин салгыыр дьоллоох дьон буолабыт: Михаил Андреевич Алексеевы, Дмитрий Петрович Коркины, Георгий Евдокимович Бессоновы, Парфений Никитич уонна Надежда Евменьевна Сасмоновтары уо.д.а. киэн тутта ааттыыбыт.
Күндү учууталлар! Барыгытын идэлээх бырааһынньыккытынан, бүгүҥҥү бэлиэ күнүнэн эҕэрдэлиибит! Эһиги үтүө суобастаах үлэҕит куруук хайҕабылы, махталы ыла турдун. Хас биирдии эһиги үөрэнээччигит аата ааттаннын, суола сырдык буоллун.
Учуутал, эн сүдү ааккар сүгүрэйбин, эн билиигэр-көрүүгэр талаһабын, эйигин күндүтүк ааттыыбын!
Кэскил14.ру