Алтынньы 1 күнүгэр 1975 сылтан, Аан дойдутааҕы муусука күнүн бэлиэтииллэр. Муусука искусствотын дьоҥҥо–сэргэҕэ тарҕатар сыаллаах бэлиэ күнү биһиги оскуолабытыгар эмиэ бэлиэтээтибит. Бу күҥҥэ анаан «Мусукаалнай переменалар» буолан аастылар.
Манна Оҕо ускуустубатын оскуолатыгар үөрэнэр оҕолор кыттан, «тыыннаах» муусуканы фортепиананан оонньоон, ураты переменалары бэлэхтээтилэр, киэҥ сэҥээриини ыллылар. И.С.Бах, Б.Бриттен курдук биллибит улуу классическай композитордар айымньыларын, Оля Прохорова 10 «Г» кылаас , Юлиана Гурьева 8 «Г» кылаас, уонна саҥа фортепианаҕа үөрэнэ сылдьар 2 кылаас үөрэнээччитэ, Одри Макарова толорон, үгүс болҕомтону ыллылар, тыыннаах муусука абылыыр ураты эйгэтин тэрийдилэр.
Муусука кэрэ эйгэтигэр киллэрэн, бары өттүнэн сайдыылаах оҕолорбут, умнуллубат кэрэ түгэннэри бэлэхтээтилэр. Бу курдук «Муусукаалнай переменалар» кэмиттэн кэмигэр ыытылла туруон баҕарабыт.
Татьяна Олесова, Дьокуускай куорат 17№-дээх орто оскуола 10 «В» кылаас үөрэнээччитэ