Быйыл бастакыбын ыстаадаҕа табалаатым. Табалаан көрбүт киһи диэн сыал-сорук туруоруммутум. Наставниктарым биригэдьиир Альберт Колесов уонна Аяна Слепцова этилэр. «Суоҕанчааҥҥа» диэн сиргэ түүҥҥүлээбитим, оттон «Чинэндьэҕэ» күнүскүлээбитим. Кырдьаҕас табаһыттар сиэри-туому кэпсииллэр, тутуһуннараллар.
Ыстаада айылҕата туспа ураты буолар эбит. Таастара улахан, тиит суох, нэлэмэн туундара. Сибэкки арааһа үүнэр, урут хаһан да көрбөтөх сибэккилэрим эбит. Сайын куйаас түһэр. Бырдах быйыл кыра дииллэр, киһи тулуйар этэ. «Бүгүлэх» элбэх.
Күһүн табалыыр ыарахан. Тоҕо диэтэххэ, табалар тэллэйи батыһан ырааталлар. Таба эмиэ киһи курдук араас майгылаах. Ыстаадаҕа барыта 2000 ааһар элбэх таба баар. Онон табаны өҥүнэн араарар буоллум. Өр көрдөххүнэ өйдүүгүн. 2-3 уучаҕы биэрбиттэрэ. Биирдэ миинэн баран 3 күн сынньатаҕын. Аһара ырыган буоллаҕына мииннибэккин. Миигин уучаҕы миинэргэ Алеша уһуйбута. Ол курдук, улахан дьону кытта Проня, Алеша бииргэ табалаатыбыт, күн солото суох.
Ыстаадаҕа араас аһы аһаатым: быар алаадьыта, таба үүтэ, сүрэх, тыл, чубуку этэ, сорчо. Чубуку этин сөбүлээтим. Идэһэ өлөрдөхтөрүнэ Валентина Николаевна, Мария Иннокентьевна араас бурдук аһын астаан аһаталлар: пельмень, беляш, бэрэски.
Ыстаадаҕа кыахтаах, бэйэҕин кыанар эрэ буоллаххына бараҕын. Харчы ылар буоллаххына үлэлиэхтээххин. Сиргин үчүгэйдик билиэххин наада, тоҕо диэтэххэ мунуоххун сөп. Күүстээх туман түһэр, туох да көстүбэт буолар, онон хараҕын эмиэ үчүгэй буолуон наада. Маны таһынан, куруук табаҕын көрө сылдьыаххын наада. Бөрө да баар, табаны тутуохтарын сөп. Бөрөнү ыраахтан көрбүтүм.
Сайыҥҥы сынньалаҥмын үлэҕэ уһаарыллан атаардым. Үс ый үлэлээн хамнастанным. Эһиил эмиэ экзамен кэннэ ыстаадаҕа тахсар баҕалаахпын. Ыстаадаҕа киэһэ аайы интернет холбууллар. Дьоммун кытта сибээстэһэ олоробун. Атастаһа сылдьан (смена) үлэ түүҥҥү, күнүскү диэн арахсар. Сыарҕа көлүйэргэ, уучах ньоҕуланарга, табалыырга баҕа санаалаах киһи үлэлиир үлэтэ эбит.
Вася Старостин, 9 кылаас, Кустуур орто оскуолата, Эбээн Бытантай