Балаҕан ыйын 25-27 күннэригэр Дьокуускай куорат Комсомольскай болуоссатыгар Өрөспүүбүлүкэтээҕи «Продовольствие-2026» агропромышленнай быыстапка-ярмарка ыытылла турар. Тэрээһин чэрчитинэн Саха сирин табаары оҥорон таһаарар тыа хаһаайыстыбатын бородууксуйаларын быыстапка-атыыта ыытыллара күүтүллэр, ону таһынан үөрэх тэрилтэлэрин истэринэн куонкурус буолара былааннанар.
«Продовольствие» быыстапка-ярмарка хас сылын аайы 1999 сыллаахтан үрдүк таһымнаахтык ыытыллар. Быйыл 27-с төгүлүн буола турар. Бэлиэтээн эттэххэ, маннык агро хайысхалаах оскуолалар Арассыыйа үрдүнэн аан маҥнайгытын Саха сиригэр баар буолбуттара, үлэлэрин саҕалаабыттара уонна 3 хайысхалаах бэйэтин аанын аспыта: 1) агро-кылаас; 2) хаһаайыстыба оскуолата; 3) агро оскуола. Ол курдук, 2025 сылга Саха сиригэр 3 агро кылаас тэриллибит эбит буоллаҕына, быйыл, 2026 сылга, 10-чака агро кылаас баар буолбута биллэр. Ону таһынан, биһиги агро кылаас холобурбутунан Арассыыйа иһигэр тэриллэр баҕа санаалар баалларын тэрийээччилэр иһитиннэрдилэр.
Куонкуруска Амма, Горнай, Кэбээйи, Мэҥэ Хаҥалас, Хаҥалас, Чурапчы, Үөһээ Дьааҥы улуустарын уонна Дьокуускай куорат оскуолалара кыттыыны ылаллар. Ол курдук, 13 үөрэх тэрилтэтэ күөн көрсүөхтэрэ уонна 3 оскуола кэтэхтэн кыттыахтара.
Хас биирдии оскуола бэйэтин уопутун, оскуола агро хайысхалаах үлэтин, кылааһын, сайыҥҥы быраактыкаларын түмүктээн кэпсиэхтэрэ, көрдөрүөхтэрэ. Күрэх хас даҕаны анал ааттарга оскуолалары бэлиэтиэҕэ: «Бастыҥ пришкольнай учаастак», «Бастыҥ оскуола фермата», «Саҥаттан оҥорон таһаарыыга бастыҥ оскуола» уонна «Бастыҥ Арктика агро хайысхалаах оскуолата».
Тэрээһин чэрчитинэн чуолаан бэйэлэрин сонун бырайыактарын Амма 1-кы №-дээх(Амма), Бөтүҥ(Амма), Атамай(Горнай), Танара(Кэбээйи), Кэбээйи(Кэбээйи), Майа уонна Хорообут орто оскуолалара, Хаҥалас уонна Чурапчы улуустарын оскуолалара, ону таһынан Хатас орто оскуолата көмүскээтилэр.
«Быйыл биһиги хортуоска ыстыбыт уонна хас даҕаны тонна куул ыллыбыт. Биир ураты үлэбитинэн быйыл бурдук, от ыһыыта уонна ону чинчийии үлэтэ буолла. Быйыл оннук саҥа экспериментальнай площадка арыйдыбыт. Ол курдук, бурдук 6 көрүҥүн ыстыбыт, олортон ордук ячмень үүннэ диэн бэлиэтиибит. Былыр-былыргыттан биһиги өбүгэлэрбит ячмень бурдугунан аһаан кэллэхтэрэ, ол да сабыдыал буолбута буолуо, чахчы күүскэ үүннэ. Ячмень хайдах баҕарар усулуобуйаҕа үүнэр эбит. Ону тэҥнээтэххэ, холобура, сэлиэһинэйбит быйыл сиппэтэ, — Айыы Кыһата национальнай гимназия географияҕа учуутала Кюннэй Анатольевна Ильина санаатын үллэстэр.
Оттон кэтэхтэн 3 оскуола кыттыыны ылла: Арыылаах, Сартаҥ уонна Борулаах орто оскуолалара(Үөһээ Дьааҥы). Бу оскуолалар «Бастыҥ Арктика агро хайысхалаах оскуолата» анал аат иһин киирсиэхтэрэ, ону таһынан Арыылаах орто оскуолата оскуола ферматын уонна саҥаттан оҥорон таһаарыы туһунан уопутун үллэстиэҕэ.
Быйылгы быыстапка-ярмарка маннык барылынан ыытыллар:
Балаҕан ыйын 25 күнүгэр 10:00-19:00 чааска диэри Саха сирин оҥорон таһаарар бородууксуйаларын быыстапка-ярмарката, тэрээһин үөрүүлээх арыллыыта, устудьуоннар кэнсиэртэрэ уонна сыыр, арыы, эт аһылыктар дегустациялара ыытылынна.
Бүгүн, балаҕан ыйын 26 күнүгэр, быыстапка-ярмарка салгыы улэлиир, Саха сирин агропромышленнай комплекс бастыҥ үлэһиттэрин наҕараадалааһын ыытыллар. Маны таһынан, тэрээһин чэрчитинэн Саха сирин тыа хаһаайыстыбатын министерствотын бириистэригэр АГАТУ ипподромугар ат сүүрдүүтэ ыытыллар.
Балаҕан ыйын 27 күнүгэр быыстапка-ярмарка бүтэһик күнэ уонна быйылгы тэрээһин үөрүүлээх сабыллыыта буолуоҕа.
Үс күн устата сахабыт сирин олохтоохторо бэйэбит оҥорон таһаарар бородууксуйаларбытын, оскуолалар уонна тэрилтэлэр үлэлэрин түмүгүн кытта ыкса билсиэхтэрэ, көрүөхтэрэ. Маннык ыытыллар тэрээһиннэр, чуолаан бу быыстапка-ярмарка төрүт үгэспитин сайыннарыыга, тарҕатыыга, кэлэр көлүөнэҕэ үтүө холобур буоларга улахан үлэни ыыта сылдьар бырайыактар. Агро хайысхалаах оскуолаларга, кылаастарга оҕолор тыа хаһаайыстыбатыгар ыкса сысталлара, сайынын тыаҕа сылдьан оту-маһы хомуйаллара кинилэри күүскэ сайыннарар уонна элбэххэ үөрэтэр.
Сиһилии:
Кэскил14.ру