Оскуолабыт балаҕан ыйынааҕы тэрээһиннэриттэн «Көмүс күһүн» бэстибээл буолар. Манна алын кылаастарга анаан кылааһынан оңорон таһаарар куонкурус буолар. Быйыл кинилэргэ «Гриб гигант» диэн куонкурус биллэриллибитэ. Кырачаан дьоннорбут учууталларын кытта туох баҕарар матырыйаалтан тэллэйи оңорон барыбытын соһуттулар. Манна маңнайгы кылаастар ийэлэрин көмөлөһүннэрэн таңастан тикпит, сабынан баайан, поролонтан оттоон-мастаан киэргэппит тэллэйдэрэ, иккистэр хортуон атахтаах, суончук сэлээппэлээх тэллэйдэрэ, үһүстэр «папье-маше» ньыманан оңорбут тэллэйдэрэ уонна төрдүстэр флистэн тикпит мухомордара кэккэлээтилэр. Дьүүллүүр сүбэни бэркэ тиритиннэрдилэр. Түмүккэ куонкурус кыайыылааҕа саамай улахан тэллэйдээх иккистэр буолан добун сурук тутан үөрдүлэр. Оттон тэллэйдэр оскуолабыт уһун коридоругар сибэккилэр быыстарыгар киэргэл буолан туруохтара.
Сылын аайы ыытыллар «Көмүс күһүн» бэстибээл биир ураты күрэхтэһиитэ улахан кылаас кыргыттарыгар ананар. Ол курдук быйыл «Түү сэлээппэ» куонкурус буолла. Манна кыргыттар кус-хаас, атын да көтөр түүтүттэн, куорсунуттан, кынатыттан сэлээппэ оңорон көрдөрдүлэр. Кыргыттар ким кус, хаас, куруппааскы, улар түүтүн, кынатын туттан араастык толкуйдаан, айан оңорбуттар. Сорохтор бэл диэтэр, хаас төбөтүн кытта туһаммыттар. Хайдах оңорбуттарын олус үчүгэйдик кэпсээн көрөөччүлэри бэркэ сөхтөрдүлэр. Дьүүллүүр сүбэ үс бастың сэлээппэҕэ миэстэлэри анаата. Оттон мин санаабар, кыргыттар бары да бэркэ оңостубуттар этэ. Онон сыыс-бөх буолан хаалар түүбүтүн толкуйун тобулан туһаннахха, бэртээхэй кэрэ көстүүлээх сэлээппэ буолар эбит ээ!
Оттон «Күһүңңү киһи күлбүтүнэн» дьаарбаңка «Көмүс күһүн» бэстибээлбитин түмүктүүр тэрээһинэ. Бу күнү улаханныын кыралыын бары олус күүтэбит. Манна кылаастар өлгөм үүнүүлэрин хомуйан, хатаран, туустаан, сибиэһэйдии, араас ас эгэлгэтин, сир аһын быйаңын, күһүңңү булт байанайыттан бэриһиннэрэн астаан аҕалан атыылыыллар. Кылааһынан күрэхтэһии буолан, олус көхтөөхтүк кыттабыт. Киэргэтии, таңныы мааныта манна көстөр. Дьаарбаңкаттан киирбит харчы кылаастарга киирэр. Оттон быйылгы дьаарбаңкабытыттан киирбит харчыны ууга барбыт Верхоянскай улууһугар көмө гынан ыыттыбыт.
Сааскылаана Бубякина, Эмилия Заболоцкая, 9 кылаас үөрэнээччилэрэ, «Эдэр корреспондент» пост юнкордара, Өлөөкө-Күөл, Орто Халыма