Балаҕан ыйын ортото, Ньурба куорат күнүгэр түбэһиннэрэн, «Саха төрүт аһа туой иһиттэн» диэн ааттаах сахалыы гастроужин буолан ааста. Бу тэрээһин саха норуотун төрүт култууратын, аһылыгын уонна иһитин-хомуоһун сөргүтэр, тарҕатар соруктаах ыытылынна. Ньурбаҕа олоҥхо дьиэтигэр мустубут ыалдьыттар саха төрүт аһын туой иһиттэн амсайдылар, ирэ-хоро кэпсэтэн, сэргэхсийэн тарҕастылар.
Бу сонун тэрээһини, гастроужины, Ньурба Хаҥалаһын дьаһалтата уонна В.А. Петрова аатынан кыраайы үөрэтэр түмэл үлэһиттэрэ толкуйдаан, тэрийэн ыыттылар. Бу сыл саҕаланыаҕыттан «Бэйэ туойа» туой мастарыскыайыгар Лена Никитовна Антонова уонна Александра Петровна Васильева бииргэ үлэлээн туойунан кытыйалары, чохоонойдору оҥорбуттара, барыта 15 киһи аһыыр иһитэ бэлэмнэммитэ. Мантан даҕатан, бу гастроужин тэриллэн ыытылынна. Туой иһит – саха олоҕор-дьаһаҕар былыр-былыргыттан киэҥник туттуллар иһит.
Бу киэһэ төрүт былыргы ньыманан ас астыырга Игорь Никитич Антонов күүс-көмө буолан гастроужиҥҥа шеф-повардаата. Кини балыктан буорса, үтүмэх диэн астары астаата. Ыалдьыттар сүрүннээн бу киэһэ бурдук, эт, балык астары, ону таһынан араас утахтары амсайдылар. Кинилэр дьоро киэһээни астынан, махтанан уонна үрдүктүк сыаналаан тарҕастылар. Ону таһынан Кутаахаан Сэргэн Лэкээрин чэй иһии церемониятын ыытта.
Биһиги өбүгэлэрбит сүүһүнэн сыллар усталарыгар тымныы дойдуга олорорго сөптөөх аһылыгы аһаан кэлбиттэрэ. Саха аһа — бу киһи этин-хаанын тутулугар, ис ирдэбилигэр сөп түбэһэр аһылык. Ол курдук, бу тэрээһин саха төрүт аһын — эт, үүт, бурдук, сир аһын — туой иһиккэ оҥорон көрдөрүү, ону сэргэ былыргы туойдьуттар сатабылларын сөргүтүү буолла.
Бу гастроужин курдук сонун аныгы тэрээһиннэр ыытыллаллара олус хайҕаллаах. Мин, эдэр көлүөнэ киһитин быһыытынан, маннык тэрээһиннэргэ кыттан норуотум култууратын билэбин, тарҕатабын уонна киэн туттабын.
Айыллаана Афанасьева, 9 кылаас,
«Ыллык» эдкорпост, Хаҥалас, Ньурба