Бүгүн мин олохпор биир саамай үчүгэй, ураты түгэн буолан ааста. Биһиги оскуолабытыгар «Оҕо саас амбассадора» диэн ааттаах блогер, ыытааччы Айыына Кожурова ыалдьыттаата. Бу ылбычча көрсүһүү буолбатах: эрдэттэн былааннаммыт көрсүһүү.
Ааспыт үөрэх дьылыгар биһиги оскуолабыт активтарын оҕолоро уонна үөрэх-иитии хайысхатын салайааччылара «Среда возможностей-2025» диэн Тимченко фондатын Грантовой күрэҕэр кыайыылаах тахсыбыппыт. Онно биһирэммит бырайыакпыт – «Месяц лидеров» диэн этэ. Ол чэрчитинэн, талааннаах, ситиһиилээх дьону ыҥыран, биһигини, тыа сирин оҕолорун кытта көрсүһүннэрэр былааннаах этибит. Бүгүн күнтэн-күн күүттэрбит маҥнайгы ыалдьыппыт Айыына Кожурова буолла.
Кини видеоларын социальнай ситимнэргэ өрүү көрөбүн. Онон кини субу аттыбар олорорун итэҕэйиэ суох курдук этим. Көрсүһүү официальнай мунньах курдук буолбата. Айыына сыанаҕа тахсыбытыгар куттана, симиттэ сылдьыбыппыт сүтэн хаалла. Кини оннук судургу, боростуой оҕо эбит. Барыбытын кытта тэҥнээхтэрин курдук кэпсэтэр. Кини тоҕо сахалыы саҥарарын хаһан да тохтоппотун туһунан кэпсээбитэ миигин ордук долгутта. «Саха тыла – мин дууһам, мин төрүт дьонум тыына. Ону хайдах умнуохха сөбүй?» – диэбитигэр ис сүрэхпиттэн сөпсөстүм.
Кини этэринэн, интэриниэт диэн кутталлаах сир буолбатах. Төттөрүтүн, бу биһиги бэйэбитин, дойдубутун, култуурабытын аан дойдуга көрдөрөр улахан былаһааккабыт буолар. «Телефоҥҥуттан куттанымаҥ, доҕор оҥостуҥ. Эһиги Сахаҕыт сирин кэрэтин видеоҕа устан көрдөрүҥ, ырыаҕытын-хоһооҥҥутун угуҥ. Дьиҥнээх, ыраас санаалаах буоллаххытына, дьон эһигини өйүөҕэ», – диэн сүбэлээтэ.
Биһиги «Кэскил» медиа-оскуоланы кытта дуогабарбытынан уонна Гран харчытынан эбии атыыласпыт камераларбытын, микрофоннарбытын көрөн-истэн хайдах үлэлэтэри, устары сиһилии көрдөрдө. Салгыы барыбытын хамаандаларга арааран, бырайыак толкуйдаппыта наһаа интэриэһинэйдик ааста. Мин доҕотторбун кытта «Хадаар сонуннара» диэн оскуола телеграм-ханаалын идеятын көмүскээтибит. Айыына биһиги идиэйэбитин хайҕаабыта уонна хайдах сайыннарыахха сөбүн туһунан бэйэтин санаатын эттэ.
Бу көрсүһүү медиа-оскуолаҕа үлэбитин өссө байытан, кэҥэтэн биэрдэ. Бастатан туран,сахам тылыгар эппиэтинэстээх буолуохтаахпын өйдөөтүм. Иккиһинэн, ханнык баҕарар саастан, ханнык баҕарар сиртэн тахсан, бэйэни сайыннарар, дьону үөрдэр кыах баарын илэ харахпынан көрдүм. Айыына бу биһиги, тыа сирин оҕолоро, куорат эрэ дьоно ситиһиилээх буолбатахтарын холобура.
Тимченко фондатыгар, Граны суруйбут, идеялаабыт оскуолабыт үөрэнээччилэригэр, учууталларбытыгар, салайааччыларбытыгар махтанабыт. Кинилэр Граҥҥа кыайан, биһиэхэ маннык кыахтары арыйан биэрдилэр. Оттон Айыына Кожурова, эйиэхэ, сырдык мичээриҥ, сайаҕас санааҥ уонна биһиэхэ, оҕолорго, болҕомтоҕор улахан махтал! Эн кэлиигиттэн барыбыт сүргэтэ көтөҕүллэн, өссө үрдүккэ тардыһар баҕа санаа үөскээтэ.
Сайаана ФЕДОРОВА, VII кылаас, «Кэскил» медиа-оскуола юнкора,
С.Д. Флегонтов аатынан Хадаар орто оскуолата, Чурапчы