Саҥа 2026-2027 үөрэх дьылын А.П. Павлов аатынан Сунтаар бастакы нүөмэрдээх орто оскуолата 640-ча үөрэнээччилээх көрүстэ. Үөрүүлээх түгэн Российскай Федерация уонна Саха Өрөспүүбүлүкэтин Өрөгөй ырыаларынан саҕаланна. Ахсыс кылаас оҕолоро оскуола гиимнин ыллаатылар.
Саҥа үөрэх дьылыгар үс бэһис кылаас арылынна: 5-а кылааска 28 оҕо, кылаас салайааччыта Андросова Н.С., 5-б кылааска 21 оҕо, кылаас салайааччыта Илларионова У.С., 5-в кылааска 21 оҕо, кылаас салайааччыта Григорьева Ч. И. Үөрүүлээх тэрээһиҥҥэ элбэх ытыктабыллаах ыалдьыттар кыттыыны ылан учууталларга, үөрэнээччилэргэ уонна төрөппүттэргэ иһирэх тыллардаах эҕэрдэ тылларын тиэртилэр.
Бу күн эҕэрдэ тылларын оскуолабыт дириэктэрэ Айаал Валерьевич Тотонов, улуустааҕы үөрэх управлениетын начальнигын солбуйааччыта Елена Дмитриевна Васильева, Ил Түмэн Судаарыстыбаннай мунньаҕын VII ыдҥырыытын народнай депутата, «Барҕарыы» фонда дириэктэрэ Афанасий Васильевич Постников, баай-дуол сыһыаннаһыыларын кэмитиэтин бэрэссэдээтэлэ Сардана Васильевна Ксенофонтова анаатылар. Саҥа үөрэх дьылыгар иитии-үөрэтии хайысхатыгар туох саҥа уларыйыылар киирбиттэрин иһитиннэрдилэр.
Оскуолабытыгар үс саҥа учуутал: Чэмэлиинэ Григорьева – физкультура, Айаал Попов – информатика учууталларынан, Дайаана Саввинова эбии үөрэхтээһин педагогын быһыытынан үлэлии кэллилэр.
Саҥа үөрэх дьылыгар бастакы чуорааны тыаһатар үрдүк чиэскэ 5-а кылаас үөрэнээччитигэр Виктория Трофимоваҕа уонна 11-а кылаас үөрэнээччитигэр Ваня Николаевка тигистэ.
Үүммүт 2026-2027 үөрэх дьыла барыбытыгар ситиһиилэри аҕаллын!
«Дьулуур» медиакиин, Сунтаар 1-кы нүөмэрдээх орто оскуолата.
Кэскил14.ру