Кылгас күөх сайыны хайа баҕарар киһи бэйэтигэр туһалаахтык уонна сөпкө аттаран атаара сатыыр. Онтон Мэҥэ Хаҥалас улууһун Тыыллыма орто оскуолатын 5 кылааһын үөрэнээччитэ Айаал Захаров уһун сайын устата Хабаровскай куорат госпиталларыгар волонтердаата.
Айаал ийэтэ Алена Лебедкина Хабаровскай кыраайга анал байыаннай дьайыы байыастарыгар 2022 сылтан бэйэтэ баҕа өттүнэн көмөлөһөр, ол эргин биллэр, саха байыастара убаастаан «Эдьиий» диэн ааттыыр киһилэрэ. Биһиги Аленаны кытары редакцияҕа көрсөн кэпсэттибит. Бэрт бойобуой, сытыы көрүҥнээх, онтон кэпсэтиибит хаамыытынан саас сааһынан арыллан истэҕин аайы, ийэлии иһирэх, эдьиийдии эйэҕэс киһи буоларын өссө төгүл бигэргэттэ.
Алена Лебедкина биэс оҕо амарах ийэтэ, тапталлаах кэргэн, бэйэтэ Лоомтука сэлиэнньэтиттэн төрүттээх. 2021 сыллаахха, хамсык ыарыыта өссө да турар кэмигэр, дьиэ кэргэнин кытары сүбэлэһэн, хараҕынан инбэлиит кыыстарын көрдөрөр сыаллаах, Хабаровскай куоракка көһөллөр. Онтон биир сылынан, дьиэлэригэр төннөн кэлээри сырыттахтарына, анал байыаннай дьайыы саҕаланар. Кинини Хабаровскайга баарын дьон-сэргэ билэн, маҥнай утаа дьон көрдөһүүтүн толорор буолбута. Аармыйаҕа барбыт уолаттары кытары көрсөрө, баһыылкалары тиэрдиинэн эрэ муҥурдаммакка, төрөппүттэртэн киирэр араас соруктары, көрдөһүүлэри толороро. 2022 сыл олунньутуттан контракт баттаспыт уолаттары кытары көрсөр, чаастарга сылдьар буолбута. Онтон балаҕан ыйыгар быстах хомуур саҕаламмыта. Сэтинньигэ госпиталларга Саха сириттэн барбыт уолаттар кэлитэлээн барбыттара. Алена онтон ыла күн бүгүнүгэр диэри бэриниилээх ыарахан үлэтэ саҕаламмыта. Госпиталларга сылдьан саха уолаттарын көрсөн, төрөөбүт дойдуларын аһын астаан, ону таһан, тарҕатан, доруобуйаларыгар, докумуон сырсыытын кыһалҕатыгар кыһарыйтарбыт байыастарга көмөтө үксээбитэ.
Айаал үһүс сылын волонтердуур
Хабаровскайга баралларыгар Лебедкиннар кыыстарын уонна кыра үс саастаах уолларын илдьэ барбыттара. Айаал үөрэнэр буолан, дойдутугар хаалбыта. Аан маҥнай, иккис кылааһы тахсан баран, сайыҥҥы сынньалаҥар атын куоракка тиийбитэ. Онно ийэтэ хайыы-үйэ волонтердаан саҕалаабыт кэмэ этэ.
— Уолум аан маҥнай Хабаровскайга кэлэригэр, госпиталга бэйэбин кытары илдьэ барбытым. Ол онно бэлэмэ суох оҕону киллэрэн, бэйэм сыыспытым. Оҕом наһаа уйадыйбыта, госпиталтан харах уулаах тахсыбыта. Олус соһуйбута.
«Ийээ, кинилэр илиилэрэ-атахтара суох, харахтара суох. Онтон миэхэ баар. Оччоҕо хайдах биһиги кинилэргэ көмөлөһүөхпүт суоҕай» дии-дии этиммитэ. Онтон ыла уолум санаата тосту уларыйбыта, — диэн ийэтэ кэпсиир.
Айаал эрдэ кыралаан ийэтигэр ас астааһыныгар көмөлөһөр эбит буоллаҕына, быйыл бэһис кылааска тахсан баран, улахан киһи оҥорор үлэтин барытын бэйэтэ оҥорор буолла: бэрэски астыыр, алаадьы буһарар, морс өрөр, госпиталларга тэҥҥэ сылдьыһан байыастары кытары көрсүһэр.
Байыастарга болҕомто наада
— Госпиталларга сытар уолаттар санаалара бөҕөх. Төһө даҕаны атахтара, илиилэрэ суох хааллар, санаалара бойобуой. Саамай уустуга ВВК чааһа, ону ааһар буолар. Онно эмиэ туох кыайарбынан көмөлөһө сатыыбын. Мин көрүүбүнэн, СВО-тан төннөн кэлбит уолаттарга бастатан туран үчүгэй психолог үлэтэ ирдэнэр. Эр дьон үксэ өйдөрө-санаалара, тыллара-өстөрө тосту уларыйан кэлэр. Саамай кыһалҕалара — түүн сатаан утуйбат буолуу. Манна психологическай көмө бириэмэтигэр көрүллэрэ олус наадалаах. Эйэлээх олоххо төннүбүт уолаттар өр бэйэлэрин булумматтар, арыгыга да охтоллор. Ол эрээри бэйэтин дьыалатын арыммыт, билигин үлэлээн тигинэтэ сылдьар бойобуой бырааттар эмиэ бааллар, — диэн Алена санаатын үллэстэр.
Волонтер буоларгын сорох киһи өйдөөбөт
Билигин Аленаҕа Уһук Илиҥҥи уокуруктааҕы Саха сирин Постпредствота Хабаровскайдааҕы филиала көмөлөһөр.
— Волонтердуур ыарахан. Сорох киһи ону өйдөөбөт. Волонтер буоллаххына, умнаһыт буолаҕын. Бэйэм туспар буолбакка, уолаттар тустарыгар. Хайдах бааһырбыт, илиитэ-атаҕа суох уолаттары көрөн туран аккаастыаҥый, сүүрэҕин, ирдэһэҕин, аҕалаҕын, толороҕун. Оройуон баһылыктара, биир дойдулаахтарым төһө кыалларынан көмөлөһөллөр. Дьокуускайга Лидия Васильевна волонтер кыыс баар, кини өрүү көмөлөһөр, бу билигин барарбар ас астаан көмөлөстө. Аны «Серебряные волонтеры» салайааччыта Валентина Васильевна дойдубар кэллэхпинэ өрүү көрсөр, көмөлөһөллөр.
Алена уолунаан Айааллыын Дьокуускайга кэлээри сылдьан, госпиталларга бүтэһигин атырдьах ыйын 27 күнүгэр сылдьыбыттара.
«Айаалтан ыйытабын, саамай улахан баҕа санааҥ тугуй диэн, онуоха уолум байыастар бары этэҥҥэ дойдуларыгар төннөллөрүн баҕарабын, онтон атын туох да наадата суох» диэбитэ.
Бу сайын эдэркээн волонтер Айаал Захаров 51460 №-дээх байыаннай чаас командирын аатыттан Махтал суругу туппута.
Бу күннэргэ волонтер Алена Лебедкина гуманитарка хомуйан, массыынанан (таксинан) иккис дойду оҥостубут Хабаровскай куоратыгар айанныахтаах.
Кэпсэттэ Анна СЛЕПЦОВА.
Кэскил14.ру