«Сахабэчээт» судаарыстыбаннай автономнай тэрилтэ иһинэн үлэлиир «Кэскил», «Бэлэм буол», «Чуораанчык», «Колокольчик», «Юность Севера» таһаарыылар уонна «Кэскил14» электроннай сайт редакцияларын коллективтара ыар сүтүктэннибит. Бу дьыл атырдьах ыйын 19 күнүгэр биллиилээх суруналыыс, СӨ култууратын үтүөлээх үлэһитэ Анатолий Николаевич Павлов- Дабыл биһиги кэккэбититтэн туораата.
Анатолий Николаевич Павлов 1954 сыл сэтинньи 19 күнүгэр Үөһээ Бүлүү улууһугар төрөөбүтэ. 1988 сыллаахха СГУ историко-филологическай факультетын бүтэрбитэ. Бүлүү, Дьокуускай оскуолаларыгар учууталлаабыта. 1991 сылтан «Кэскил» хаһыат редакциятыгар үлэлээбитэ. Өй-санаа уларыйар, дьон-сэргэ өрө көтөҕүллэр кэмин баттаһа саха култууратын, итэҕэлин сөргүтүү, тарҕатыы үлэтигэр күүскэ үлэлэспитэ, Айыы итэҕэлин түсчүтэ, «Кут-сүр» уопсастыбаннай тэрилтэ бас-көс дьонуттан биирдэстэрэ буолбута.
«Кэскил» хаһыакка үлэлиир сылларыгар итэҕэл курдук уустук, ол эрэн олус наадалаах, тыын суолталаах өйдөбүлү оҕоҕо өйдөнүмтүөтүк, судургутук иҥэрэр, өйдөтөр сыаллаах «Арчы» рубриканы саҕалаабыта. Коллегабытыгар, учууталбытыгар ытыктабылбыт бэлиэтигэр ити рубрика күн бүгүҥҥэ дылы үлэлии турар. «Арчы»– хаһыаппыт биир кырдьаҕас, оҕо аймах сөбүлүүр, сэргиир рубриката. Ону сэргэ Анатолий Николаевич 2019 сылтан көлүөнэлэр солбуйсалларыгар ситим быстыбатын, эдэр, аҕа саастаах дьон хардарыта өйөһөллөрүн туһугар утумнааһын үлэтин саҕалаабыта, суолун ыйан, хайысхалаан биэрбитэ.
Кэлиҥҥи сылларга «Саҥ тардыы» видео-уруоктары бэлэмнээбитэ. Тэҥҥэ төрүттэспит «Айыы Кыһата» национальнай гимназияҕа, Өрөспүүбүлүкэ лиссиэйигэр төрүт култуура учууталынан үлэлээн, үүнэр көлүөнэ ыччакка саха дьиҥнээх, төрүт өйдөбүллэрин иҥэрэргэ, Айыы итэҕэлин үөрэтэргэ үгүс сыратын, кыһамньытын анаабыта. «Ыйдарынан туомнар», «Айыы киһитэ (төрүт үгэһи үөрэтэргэ көмө)», «Айыы санаа кыһата» кинигэлэр ааптардара, үгүс таһаарыылар, төрүт култуура учебниктарын хос ааптардарын быһыытынан үлэлэспитэ.
Анатолий Николаевич оҕо бэчээтин, үөрэхтээһин эйгэтигэр өр сылларга үлэлээбит, кини сайдарыгар сүҥкэн кылааты киллэрсибит, үлэбит билиҥҥи хайысхатын, суолун-ииһин ыйан-кэрдэн биэрбит сүдү өҥөлөөх ытык киһибит этэ. Киһи быһыытынан аламаҕай, көрсүө майгытынан, киэҥ билиитинэн-көрүүтүнэн өрүү сүбэ-соргу, өйөбүл-тирэх буола сылдьара. Ытык киһибит туһунан сырдык өйдөбүл өйбүтүгэр-санаабытыгар мэлдьи тыыннаах буолуо.
«Сахабэчээт» судаарыстыбаннай автономнай тэрилтэ,«Кэскил», «Бэлэм буол», «Чуораанчык», «Колокольчик», «Юность Севера» таһаарыылар, «Кэскил14» сайт редакциялара
Кэскил14.ру