Биһиги санаабытыгар, наставник диэн дириҥ көрүүлээх, киэҥ толкуйдаах, бэйэтин билиититтэн дьоҥҥо бэрсэр, дьону сирдиир киэҥ толкуйдаах киһи. Наставник буолар эппиэтинэһи билигин оскуола эрдэхтэн ылына үөрэнэбит.
Быйыл оскуолабыт 100 сылын бэлиэтиир. Оскуолабытыгар алын кылаастары иитэр-үөрэтэр «Орлята России» Бүтүн Арассыыйатааҕы бырагырааманы Анна Романовна Аржакова иилээн-саҕалаан үлэлэтэр. Онтон үрдүкү кылаас оҕолоругар «Бастыҥнар хамсааһыннарын» Мария Егоровна Павлова салайар. Биһиги бу түмсүүгэ кыттабыт. Оскуолаҕа, улууска буолар араас тэрээһиннэргэ кэлбит дьоҥҥо, оҕолорго интириэһинэй оонньуулары, күрэхтэри ыытабыт. Ол таһынан биһиги «Кэскил» медиа-оскуолаҕа дьарыктанабыт. Интервью ылан, видео роликтары оҥорон, «Кэскил», ону таһынан улуустааҕы «Дабаан» хаһыакка бэчээттэнэбит.
Бэс ыйын 15 – от ыйын 6 күннэригэр биһиги «Орлята России» наставниктарын быһыытынан Дьокуускайга «Энергетик» лааҕырга сынньанныбыт.
Лена СИЛЛЯХОВА, Олияна СТЕПАНОВА,
Е.Е. Эверстов аатынан Кэбээйи орто оскуолата
ДОҔОРДОҺУУНУ, ҮӨРЭХХЭ АЛТЫҺЫЫНЫ КҮҮҺҮРДЭР
III Аан дойдутааҕы интеллектуальнай оонньуулар Дьокуускай куоракка үрдүк таһымнаахтык буолан аастылар.
Араас дойдулартан кыттааччылар мустан, билиилэрин, өйдөрүн-санааларын, толкуйдарын, сатабылларын көрдөрдүлэр. Интеллектуальнай күрэхтэр норуоттар икки ардыларыгар доҕордоһууну, үөрэххэ алтыһыыны уонна саҥа санаалары тарҕатыыны күүһүрдэр.
Биһиги кыттааччыларбыт эмиэ бэйэлэрин таһымнаах өттүнэн көрдөрөн, ситиһиилээхтик күрэстэстилэр уонна Саха Сирин аатын үрдэттилэр.
Маннык аан дойдутааҕы бырайыактар Саха Сиригэр улахан туһаны аҕалыа диэн эрэнэбин. Атын дойдулар оҕолорун билиилэрин, үөрүйэхтэрин билсэ, бэйэ-бэйэлэриттэн үөрэнэн сайдан иһиэхпит.
Лилиана ПОПОВА, III Аан дойдутааҕы интеллектуальнай оонньуулар юнкора,
Ф.Г. Охлопков аатынан Майа орто оскуолата, Мэҥэ Хаҥалас