Быйыл 2025-2026 сс. үөрэх сылын Россия үтүөлээх образцовай «Кэнчээри» норуодунай ансаамбыла 54–с сылын үрдүк көрдөрүүлэрдээх, үгүс ситиһиилэрдээх түмүктээтэ.
Ол курдук, биһиги “Кэнчээри” иитиллээччилэрэ Кыргызтан республикатыгар М.К. Аммосов сырдык аатыгар сүгүрүйэн, саха культуратын көрдөрөн, Иссык-Кульга православнай «Звездочка» лааҕырга сынньанан, духуобунас өттүнэн байан, аан дойдуга аатырбыт улуу Иссык Кульга дуоһуйа сөтүөлээн кэлбиппит. Манна үс концеры көрдөрбүппүт. Бишкек куоракка Кастальскай ,,Малай Эктениятын, Каччини ,,Аве Мариятын,, Саха сирин уонна Кыргызтан гимнэрин 4 куолаһынан үрдүк таһымнаахтык ыллааммыт итэҕэттибит, сөхтөрдүбүт. Бу ыраах айаҥҥа турунарбытыгар Ил Түмэн Вице Спикерэ, депутааппыт Александр Николаевич Жирков тэрийиитинэн, Ил Дархан Айсен Сергеевич Николаев «Эльга Уголь» тэрилтэнэн спонсордатан көмөлөспүттэригэр наһаа махтанабыт, үөрэбит.
Сыл устата «Музыка — барыбытыгар», «Хотугу сулус», «Бриллиантовай нотки» хас да норуоттар икки ардыларынааҕы конкурстарга Гран При буоллубут. Бу күннэргэ ыытыллыбыт «Музыка — барыбытыгар» проект Розовая Чайка норуоттар икки ардыларынааҕы конкурска хорбут кыайан 1 степеннээх Лауреат буоламмыт «Поют дети России» Бүтүн Россиятааҕы хоровой фестиваль республикатааҕы этабыгар эмиэ кыайан 1 степеннээх Лауреат Дипломун туппуппут. Уһук Илин округка кыайаммыт, финалга киирэммит Россияҕа бүтүн Уһук Илин округу көмүскүү, Сахабыт сирин, улууспутун ааттата Кострома куоракка барыахтаахпыт. Ону таһынан «Бары ыллыыбыт» диэн оҕолор ортолоругар ыытыллыбыт академическай ырыа конкурсугар солисткабыт Далаана Черкашина кыайан Хабаровскай куоракка Саха сирин аатын көмүскүө. Киниэхэ ситиһиини баҕарабыт! Аны Бүтүн Россиятааҕы Оҕолор Форумнарыгар 1 путевка премия ыллыбыт. Онно мин группа старостата, солистка барар чиэскэ тигистим. Онтон олус үөрдүм уонна долгуйдум. Ситиһиилээхтик кыттан кэлиэм диэн эрэннэрэбин.
Үҥкүүбүт группата улуу Китайга 2 степеннээх Лауреат үрдүк аатын ылбыттара.
Уһуйар учууталбыт Василий Степанович Парников бэс ыйын 30 от ыйын 1-2 куннэригэр Аммаҕа 4000-тэн тахса кыттыылаах республика пед.үлэһиттэрин ярмаркатыгар ,,Оҕолорго академическай ырыаны, фольклортан классикаҕа диэри ыллыырга үөрэтии тематыгар мастер класс биэрэн киэҥник биһирэннэ. Екатерина Степановна кыргыттарынаан Сахаяналыын, Сандааралыын, Эстетическэй Киин үлэһиттэриниин Ульяна Петровналыын, Иннокентий Владиславовичтыын, Сардаана Захаровналыын ,,Музей в чемодане,, диэн ,,Кэнчээри,, ансамбль 54 сыл кыайтарыыны билбэккэ улэлээн кэлбит историятын аныгылыы уникальнай технологиянан оҥорбут дакылаатынан 145 киһи кыттыылаах конкурска кыайыылаах буолла!
Ити курдук бу ааспыт үөрэх дьыла олус элбэх ситиһиилээх түмүктэннэ уонна иннибитигэр өссө элбэх былааннар күүтэллэр.
Сардаана ДЬЯКОНОВА, Мүрү 1№-дээх орто оскуолатын үөрэнээччитэ, “Кэнчээри” ансаамбыл эдэр корреспондена