От ыйын 3 күнүгэр Кэбээйи улууһун Кэбээйи сэлиэнньэтигэр, быйылгы Олоҥхо Ыһыаҕа ыытыллар сиригэр-уотугар, «Сайдам» тыйаатырга норуот суруйаачыта Николай Лугиновтуун көрсүһүү буолан ааста. Кини элбэх түгэннэри кэпсээн, биһигини, эдэр кэрэспэдьиэннэри, интэриэһиргэтэн, олус истиҥ кэпсэтии киэһэтэ буолла.
Көрсүһүү чуолаан «Таас тумус күөнүгэр» биэрии тула ааста. Ыытааччы Евдокия Игнатьевна Избекова иилээн-саҕалаан, тутаах боппуруостары туруоран ыытта. Хас биирдии көрөөччү бэйэтин санаатын эттэ, ыйытыыларын биэрдэ.
Оттон мин киниэхэ биэрбит «Оскуолаҕа үөрэнэ сылдьан, иллэҥ кэмҥэр тугунан дьарыктанар этигиний?» диэн ыйытыкпар маннык хоруй туттум:
Мин иллэҥ кэм да диэним аҕыйах этэ, ол эрэн куруук бириэмэ көһүннэ да бибилэтиэкэҕэ барарым. Сахалыы кинигэ бөҕө ааҕар этим, бибилэтиэкэ кинигэтин барытын аахпытым буолуо, кэнники нууччалыы эрэ айымньылары ааҕар буолбутум. Үрүссээгим толору кинигэ буолара, — диэн кэпсээтэ Николай Алексеевич.
Иккис ыйытыгым маннык этэ: «Суруйааччы буолбатаҕын буоллар ханнык идэни баһылыаҥ этэй?». Николай Алексеевич ити ыйытыкка кыратык мунаахсыйбыта, ол эрээри эппиэт биэрбитэ:
Мин математика уруогар наһаа чэпчэкитик үөрэнэр этим. Туох баар садаачаны, суоттааһыны түргэн үлүгэрдик толорорум, ол иһин атыттарга көмөлөспөтүм курдук кылаастан таһааран кэбиһэллэрэ. Кэнники суруйааччы буоларбар «Математик уол сүрдээх үчүгэй суруйааччы буолбут» диэн олус өрө көтөҕөллөр этэ.
Ону таһынан, Николай Лугинов «Дойду оҕото Дорогуунап Ньукулай» кинигэ тахсыан иннинэ хайдаҕын олох билбэппин диэн эппитэ. Ити кинигэни хос-хос ааҕара эбит. «Хайдах курдук миэхэ элбэҕи биэрбитэ буолуой» диэн бэйэтин санаатын эппитэ. Онон Николай Лугинов кыра сылдьан сөбүлүүр айымньытын уонна суруйааччытын туһунан бу көрсүһүүттэн биллибит.
Көрсүһүү бүтүүтэ норуот суруйааччытын Николай Алексеевич Лугинову кытары хаартыскаҕа түһэн, историческай түгэни хатаатыбыт. Бүгүҥҥү кэпсэтиини олус астынан тарҕастыбыт.
Карина Сыроватская, Кэбээйи орто оскуолатын 8 кылааһын үөрэнээччитэ, «Кэскил» медиа оскуола эдэр кэрэспэдьиэнэ