Ыам ыйын 19 күнэ — 1922 сыллаахха тэриллибит В.И. Ленин аатын сүгэр Бүтүн Сойуустааҕы пионерскай тэрилтэ үөскээбит күнэ. Бу күн элбэх киһиэхэ оҕо сааһы, доҕордоһууну, аатырбыт кыһыл хаалтыһы, линиэйкэлэри санатар буолуохтаах. Пионердар общественнай олоххо кытталлара, аҕам саастаахтаарга көмөлөһөллөрө, спордунан уонна айар үлэнэн дьарыктаналлара, хамаандаҕа үлэлииллэрэ.
Ол курдук, 1984 сыллаахха «Бэлэм буол» хаһыат 40№-дээх таһаарыытыгар «Маҥнайгы пионердар ахталлар» диэн ахтыы-ыстатыйа тахсыбыт. Ол ааптарынан В.И. Ленин аатынан Уолба аҕыс кылаастаах оскуолатын 1926-1931 сыллардааҕы пионерката А.Г. Андросова буолар. Кини суруйбут ахтыытын эһиэхэ билиһиннэрэбит.
Барабаан дирбийэр
— Биһиги пионерга 1926 сыллаахха кылааһынан бүтүннүү киирбиппит. Бу кэмҥэ оскуола директорынан Семен Мефодьевич Кочкин үлэлиирэ. Кини биһигини салайара. Сайын пионердар бары биир форма таҥаһы таҥнарбыт. Кыргыттар хараҥа күөх дьууппаны кытта сырдык от күөҕэ куоптаны, уолаттар от күөҕэ ырбаахыны кытта хараҥа күөх шортик кэтэллэрэ. Барыбыт түөһүгэр уот кыһыл өҥнөөх сатыын хаалтыс тэтэрэ кыыһара. Дьэ маннык таҥнан, үс барабаан тааһынан доҕуһуоллатан, Таатта үрэх үрдүгэр парадтаан тиийэн пионерскай кутаа отторбут, оонньуурбут, аһыырбыт. Төннөрбүтүгэр сибэкки үргээн аҕалан оскуолабыт түннүктэрин киэргэтэн ууга угарбыт. Маннык үөрүүлээх сбордар сотору-сотору буолаллара. Мин маачаха ийэм уонна аҕам пионерга киирбиппин сөбүлээбэтэхтэрэ. Бу кэмҥэ Таатта улууһун устун бытанан сылдьар бандьыыттар кэлэн ааһыталыыллара. Биһиги, пионердар, үөрэҕэ суохтары букваны билэр буолуохтарыгар диэри үөрэтэрбит, кирпииччэ үктүүрбүт, оттук мас бэлэмнээһинигэр көмөлөһөрбүт. 1922 с. Уолбаҕа сэрии буолбута. Онно элбэх арааһынай ботуруоннар хаалбыттарын биһиги хомуйарбыт уонна сельскэй совекка туттарар буоларбыт. Биир сайын Уолбаттан Ытык Күөлгэ диэри (30 км) түөрт уонча пионер походка сатыы барбыппыт. Хас сайын аайы Фея Матвеевна Уткина салайыытынан оҕуруот аһын ыһарбыт уонна ону көрөр-харайар буоларбыт. Ити сылларга оскуолабытыгар бараан иитэ сылдьыбыппыт. Биһигини учууталларбыт эйэлээх буоларга, үчүгэйдик үөрэнэргэ, улахан дьону убаастыырга, төрөөбүт айылҕаны харыстыырга үөрэтэллэрэ.
Пионер күнүнэн! Куруук доҕордуу, эйэлээх буолуохха, кэрэҕэ-үтүөҕэ талаһыахха!
Кэскил14.ру