Мария Андреевналаах оччолорго Воронежскай уобалас Старокожево дэриэбинэтигэр олорбуттара. Аҕалара Андрей Максимович, дьээдьэлэрэ Сергей Рыжков сэрии толоонугар охтубуттар.
Сэрии бүппүтүн кэннэ Мельниковтар Алдан куоратыгар олохсуйбуттара. 1965 сыллаахха төрөөбүт уолларыгар эһэтин Андрей аатын биэрбиттэрэ. Сытыы-хотуу, кыайыгас-хотугас уол VIII кылаас кэнниттэн Алдан политехникумун үөрэнээччитэ буолбута. Үчүгэй үөрэҕин, спорка бастыҥ ситиһиитин иһин үрдэтиллибит стипендияны ылара. 1985 сыл кулун тутар 16 күнүттэн Афганистаҥҥа сулууспата саҕаламмыта.
Ыам ыйын 4 күнүгэр дьонугар суруйбута: «Ийэм, аҕам, дорооболоруҥ! Өр суруйбатахпар бырастыы гыныҥ. Ааспыт сурукпар эһигини куттаамаары тутууга үлэлиибин диэбитим. Билигин бу Афганистан суруйабын. Хаста даҕаны вертолетунан сорудахха көтүһэ сырыттым».
Сотору буолаат, бэс ыйын 3 күнүгэр, ийэтэ Мария Андреевна, аҕата Александр Семенович соһумар биллэриини туппуттара: «Эһиги уолгут младшай сержант Мельников А.А. АДР территориятыгар бойобуой сорудаҕы толоро сылдьан, командирын бэйэтинэн хаххалаан хорсуннар өлүүлэринэн өллө».
Уолун оннугар кэлбит Кыһыл сулус орден төрөппүт ийэҕэ тапталлаах уолчаанын солбуйуо дуо? Икки сэриигэ саамай чугастан-чугас, истиҥ дьоннорун сүтэрбит дьахтар сүрэҕэ төһөлөөх хаанынан ытыыра буолуой?! Оо, сэрии! Сэрии, тоҕо ыаргыный!!!
А. ВАСИЛЬЕВ
«Бэлэм буол» хаһыат 1990 сыл ыам ыйын 8 күнүнээҕи нүөмэрэ