Биһиги нэһилиэкпитигэр 40-с сыллардаахха Тандабыт Томторугар сабыллан турбут таҥара дьиэтигэр биэс куойкалаах бастакы балыыһа аһыллыбыт эбит. Кини бастакы, иккис Байаҕантай, Бээрийэ, Түүлээх уонна бастакы, иккис Курбуһах нэһилиэктэрин хабан олохтоохторго улахан көмөнү оҥорбута. Онно биэлсэринэн Никита Васильевич, онтон сиэстэрэнэн Евдокия Михайловна Дэхсилээхэбэ диэн Тааттаттан төрүттээх кыыс үлэлээбиттэр.
2004 сыллаахха Саха Республикатын Президенэ В.А. Штыров ыйааҕынан Никита Васильевич Готовцев аата үйэ-саас тухары Танда участковай балыыһатыгар иҥэриллибитэ.
Күн бүгүн Тандатааҕы участковай балыыһа үс нэһилиэги – Танда, Тиит Арыы, Бээрийэ – хабан үлэлии турар. Балыыһаҕа 2019 сылтан сэбиэдиссэйин терапевт быраас Нина Васильевна Черкашина үлэлиир. Бүгүн биһиги кинини көрсөн кэпсэттибит.
Кэпсэтиибитин «Доруобуйа» национальнай бырайыак чэрчитинэн ыытыллар диспансеризация туһунан саҕалаатыбыт.
– Диспансеризация сылын аайы былаанынан баран иһэр. Ол түмүгэр ыарыыны эрдэттэн булан, сэрэтэр үлэлэри ыытабыт, сөптөөх эмтээһини оҥоробут, – диэн билиһиннэрдэ.
Биһиги нэһилиэкпит улус кииниттэн тэйиччи сытар буолан, «Мобильный доктор» бырайыак ордук улахан туһулааҕын туһунан этэр. «Мобильный доктор» 12 испэсэлиистээх биригээдэтэ Тандаҕа ааспыт сайын бэс ыйыгар кэлэн үлэлээн барбыт. Олохтоохтор доруобуйаларын көрдөрүнэн, абыраммыттар даҕаны, астыммыттар даҕаны.
– Маны таһынан улуус кииниттэн передвижной ФЛГ аппарат сылын аайы кэлэр. Ыраах сытар нэһилиэк буоламмыт бу олус туһалаах. 2025 сылга сэтинньигэ кэлэн барбыта, уопсайа 275 киһи ФЛГ-ҕа түспүтэ, – диэн кэпсиир Нина Васильевна Черкашина.
Билиҥҥи туругунан нэһилиэкпитигэр 363 киһи олорор. Нэһилиэнньэ ахсаана аҕыйаан иһэр: үксэ аҕам саастаах дьон, кинилэр дойдуларын хаалларан ханна да барбаттар, онтон төрүүр саастаах, төрүөн сөптөөх ыал ахсаана аҕыйаан иһэр. Ол да буоллар нэһилиэкпитин таптаан, сөбүлээн олохсуйан олорор дьон син биир баарбыт. Онон федеральнай, республиканскай, муниципальнай бырагыраамаларынан ирдэниллэр эминэн-томунан хааччыллыы, медицина сүрүн хайысхалара нэһилиэнньэҕэ тиийэр.
Арианна АБРАМОВА, VII кылаас,
М.Н. Готовцев аатынан Танда орто оскуолата, Уус Алдан