Бүгүн, муус устар 27 күнүгэр, Сахабыт сирин таптыырбытын биллэрэр күммүт. Ол курдук, бүгүн оскуолабытыгар араас хабааннаах тэрээһиннэр ыытылыннылар:
«Дьоһуннааҕы кэпсэтиигэ» Саха сирэ туспа автономия буоларыгар сүҥкэн кылааты киллэрбит Максим Кирович Аммосов, Илья Егорович Винокуров тустарынан кылаас чаастара ыытылыннылар. 5-с кылаастарга оскуолабыт библиотекарьа Саргылана Константиновна Заровняева олус дириҥ ис хоһоонноох уруогу бэлэмнээн, оҕолорго М.К.Аммосов туһунан ойуулук көрдөрдө уонна викторина оонньотто.
Үрдүкү кылаас уолаттарыгар педагог-организатор Николай Григорьевич Иванов «Мин Саха сирин олохтооҕобун» диэн дебат ыытта.
Уруоктар быыстарыгар переменаларга өбүгэ оонньууларын, остуол оонньууларын оонньоотубут, 6 «б» кылаас үөрэнээччилэрэ саха былааҕын өрүү илдьэ сылдьарга брелок оҥордулар.
14 сааһын туолбут оҕолор улууспут Аҕа баһылыга Никита Викторович Андреев иилиититтэн үөрүүлээх быһыыга-майгыга паспордарын туттулар.
Үөрүүлээх линейкаҕа ыҥырыылаах ыалдьыттарбыт — Бэрдьигэстээх нэһилиэгин баһылыга Алексей Григорьевич Аргунов, нэһилиэк депутаттарын сэбиэтин бэрэссэдээтэлэ Анатолий Васильевич Лю-Фа уонна оскуолабыт дириэктэрэ Павел Алексеевич Петров эҕэрдэ тыл эттилэр. 3 «б» кылаас үөрэнээччилэрэ Саха сирин туһунан бэйэлэрэ айбыт хоһооннорун ааҕан иһитиннэрдилэр, Виктория Петровна Колодезникова ырыа бэлэх уунна уонна үөрүүлээх линейка оһуохайынан түмүктэннэ. Оһуохайы 4-с кылаас үөрэнээччитэ Максимова Таисия, 5-с кылаас үөрэнээччитэ Виктория Андросова, 7-с кылаас үөрэнээччитэ Константин Григорьев, 9-с кылаас үөрэнээччитэ Эдита Антонова уонна Саха сирин Дархан этээччитэ Дария Егоровна Алексеева таһаардылар, оһуохайы оройуттан туттулар.
Сиһилии:
Константин Капитонов, Сайаана Попова, «Сайдам» медиакиин эдэр кэрэспэдьиэннэрэ, Бэрдьигэстээх, Горнай