Муус устар 27 күнэ саха норуотун историятыгар ураты суолталаах бэлиэ күн. 1922 сыллаахха бу күн саха норуотун чулуу уолаттара Былатыан Ойуунускай, Исидор Барахов, Максим Аммосов Саха сирэ автономия буоларын ситиспиттэрэ. Ол саха омуга сайдыытыгар улахан төһүү күүс, бигэ тирэх буолбута.
Сылын ахсын долгуйан туран, Исидор Бараахап төрөөбүт дойдутугар, Харбалаахха, Саха Өрөспүүбүлүкэтин күнүн бэлиэтиибит. Бу күн биһиэхэ Саха Өрөспүүбүлүкэтин Бырабыыталыстыбатын Бэрэсэдээтэлэ Кирилл Евгеньевич Бычков ыалдьыттаата. Биир дойдулаахпыт, өрөспүүбүлүкэбит Автономиятын төрүттэспит уһулуччулаах политическай уонна общественнай деятель Исидор Никифорович Барахов мэҥэ тааһыгар үөрүүлээх миитин ыытылынна, култуура киинигэр үөрүүлээх мунньах буолан ааста.
Бу дьоро түгэҥҥэ Кирилл Евгеньевич Бычков Үөһээ Бүлүү улууһун олохтоохторун бырааһынньыгынан итиитик- истиҥник эҕэрдэлээтэ, үтүө үлэлээх улуус дьонугар наҕараадалары туттартаата.
Мунньах үөрүүлээх түгэнинэн 14 саастарын туолбут оҕолорго бастакы паспортары туттарыы дьоллоох түгэнэ буолла. Салгыы ыалдьыппыт Кирилл Евгеньевич Исидор Браахап түмэлигэр ыалдьыттаата. Киниэхэ анаан 5 кылаас үөрэнээччитэ Тулусхан Николаев уонна история учуутала Мария Алексеевна Кузьмина И.Н.Барахов олоҕун, үлэтин туһунан экскурсия ыыттылар.
Бүгүн өрөспүүбүлүкэ бары олохтоохторо түмсэр, сомоҕолоһор үөрүүлээх, кэтэһиилээх күммүт. Өрөспүүбүлүкэбит күнүнэн киэн туттан тураммыт эҕэрдэлиибит.
Бары бииргэ буолуоҕуҥ, иннибит диэки кыьамньылаахтык уерэниэ5иҥ, сайдыа5ыҥ, иннибит диэки эрчимнээхтик хардыылыаҕыҥ. Тапталлаах Сахабыт сирэ сайдарын туһугар бары кыһамньыбытын ууруоҕуҥ. Олохпутугар улахан суолталаах күммүтүн өрүү өрө тутуоҕуҥ!
Сиһилии:
«Куорсуннаах сурук» медиакиин, Үөһээ Бүлүү, Харбалаах.