Муус устар 10 күнүгэр Үөһээ Бүлүү улууһун Мэйик нэһилиэгэр үгэскэ кубулуйбут Буучугурас бирииһигэр оҕолорго хапсаҕайга аһаҕас турнирдара буолан ааста. Сыллата ыытыллар турнирга сөбүлээн сылдьабын. Быйыл уолбунаан көрөн кэллибит. Күрэхтэһиигэ уопсайа сүүстэн тахса оҕо кытта кэлбит.
Урут мэлдьи кыттар Кэбээйи, Ньурба бөҕөстөрө быйылгы күрэххэ кэлбэтэхтэр. Сүрүннээн Бүлүү, Үөһээ Бүлүү оҕолоро күөн көрүстүлэр. Мэлдьи буоларын курдук күрэхтэһии тэрээһинэ үрдүк таһымнаах. Кыайыылаахтарга уу харчынан бириис, чөмпүйүөн лиэнтэтэ, мэтээл, добун сурук бэлэм. Быйылгы күрэхтэһиигэ саҥа кыттааччылар бааллара үөртэ. Ол курдук, Кырыкый, Сургуулук оскуолалара халыҥ хамаанданан тэринэн кэлбиттэр. Кырыкыйдарга Тааттаттан күтүөт уол кэлэн үлэлээн эрэр эбит. Көҥүл тустууга Россия спордун маастара. Өйөбүл быһыытынан Кырыкый нэһилиэгин олохтоохторо Василий Прокопьев, Сергей Ильин нэһилиэк дьаһалтата бензин кутан үс массыынанан уон алта оҕону күрэхтэһиннэрэ аҕалбыттар.
Кырыкыйы Кырыкый дэппит Юрий Павлов кэлэн күрэх кылаабынай судьуйатынан үлэлээтэ. Тренер уолга тиийэммин: «Бөҕөстөргүтүн илдьэ Юрий Павловы кытта хаартыскаҕа түһүҥ, Кырыкый тустууктарын ааттаппыт киһи сылдьар», — диэн сибис гынан сүбэлээтим. Уолум үөрүүнэн сөбүлэстэ. Миигинниин биэс хааһах диэбиккэ дылы «Бочуоттаах ыалдьыт бэлиэтин» түөспэр иилинэн, эбиитин Буучугурас мөссүөннээх мэтээл кэтэрдэн чиэстээтилэр. Онон соһуччу үөрүү үрдэ суох буолла.
Валерий Федоров курдук саха биир чулуу хапсаҕайдьытын, талааныгар сүгүрүйэр киһибин көрсөн үөрэ-көтө сэлэстим. Кыра сиэн уола хапсаҕайдыырын кэтээн көрө, сүбэ-ама буола сылдьар эбит. Хапсаҕайы сэҥээрээччилэр солбуктарын аҕалара, ийэлэрэ арыаллыы сылдьаллар. Мэлдьи буоларын курдук харах уулаах хотторуу, үлүскэннээх кыайыы өрөгөйүн билбит үөрүүтэ үгүс.
Кырыкый оҕолоро араас албаһы туһанан бырахсаллара көрөргө үчүгэйэ сүрдээх. Семен Степанов (4 кыл.), Вася Васильев Вася (7 кыл.) кыайыы өрөгөйүн билэн, түөстэригэр мэтээл кэтэн үөрдүлэр-көттүлэр.
Аны аҕыйах сылынан хапсаҕай уйата Үөһээ Бүлүү дэтэр улууспутун ааттаттар бөҕөстөрбүт, инники эрэллэрбит маннык күрэхтэһиилэртэн иитиллэн тахсыахтара буоллаҕа.
Руслан Николаев-Дархан, Күүлэт.
Кэскил14.ру