Бүгүн 8 кылаас уолаттарыгар библиотека дьиэтигэр санаа атастаһыыта (дебаты) ыытылынна. Икки хамаандаҕа арахсан оҕолор тирээн турар суолталаах боппуруостарга мөккүстүлэр, санааларын этиннилэр. Бу мөккүөргэ кыттааччылар бэйэлэрин этиилэрин дакаастаан турууластылар, дьүүллүүр сүбэни, көрөөччүлэри кырдьыктаах этиилэригэр итэҕэтэргэ дьулустулар.
Тыл этии бириэмэтэ хааччахтаах буолла. Мөккүөр сыала — ордук итэҕэтиилээх чахчылары, дакаастабыллары уонна дириҥ толкуйу көрдөрөн кыайыы.Мөккүөргэ икки өрүт кытынна — тиэмэни «көмүскээччи» уонна «утарааччы». Мөккүөрү дьүүллүүр сүбэ сыаналаата.
Бастакы тиэмэ: «Оҥоһуу өй киһини үлэтэ суох хаалларыа дуу эбэтэр үлэ миэстэтин булан биэриэ дуу?»
1-кы хамаанда сүрүн санаата маннык буолла:
-Оҥоһуу өй киһи санаатын өйдөөбөт, ол иһин сыыһа эппиэттэри биэриэн сөп. Оҥоһуу өйү элбэхтик туһаннахха, киһи бэйэтэ толкуйдуур дьоҕура мөлтүөн сөп.ОӨ киэҥ эйгэни хабар, онон элбэх киһи үлэтэ суох хаалыан сөп.
Оттон 2-с хамаанда санаата маннык:
-Оҥоһуу өй боппуруоһу түргэнник ырытар, киһиэхэ көмөлөһөр. Холобур, тылбааска, информация көрдүүргэ эппиэти судургутук булар. Кини көмөтүнэн сахалыы тылы, култуураны харыстыырга улахан кыах баар, ойуулар, араадьыйа, кэпсээн, тылбаастар. Оҥоһуу өй сылайбат, утуйбат буолан, хаһан баҕарар көмөлөһүөн сөп.
Иккис тиэмэ: «Смартфону оскуолаҕа үөрэх кэмигэр илдьэ сылдьыыны бобуу сөптөөх дуо?»
1-кы хамаанда:
-Смартфон көмөтүнэн төрөөбүт тылы үөрэтэр ордук судургу буолла. Сахалыы видео, подкаст, тылбаас.Биир санаалаах дьоннуун сибээстэһэргэ көмөлөөх, араас ойуулары ыытар, ыраах сылдьар аймаххын кытта билсэргэ туһалаах уонна наадалаах. Смартфоҥҥа оҥоһуу өй баар буолан, киһи хаһан баҕарар эппиэт эбэтэр сүбэ булуон сөп.
2-с хамаанда:
-Смартфон үгүс дьону бодоруһартан, бэйэ-бэйэни кытта тылынан кэпсэтэртэн тэйитэр. Смартфону сатаан туһамматахха, киһи араас албыҥҥа түбэһиэн эбэтэр сыыһа иһитиннэриини итэҕэйиэн сөп.
Мөккүөргэ 1-кы хамаанда элбэх чахчыларга олоҕуран, олохтон элбэх холобурдарга тирэнэн санаатын толору этиннэ. Санаа атастаһыыта оҥоһуу өй уонна смартфон киһи олоҕор көмөлөөхтөр эрээри, киһи бэйэтэ толкуйдаах, ырытар, сыаналыыр дьоҕурдаах буолара ордук улахан суолталаах диэн түмүк санааҕа аҕалла.
Оҕолорго Дүллүкүтээҕи Култуура, сынньалаҥ киинин үлэһитэ, эдэр поэт Николай Васильевич Васильев- Харыйалаах Уола уонна олохтоох дьаһалтаҕа тыа хаһаайыстыбатын испэсэлииһэ Николай Анатольевич Седалищев кэпсэтиини салайан, хайысхалаан көмөлөстүлэр. Тэрээһини оскуола психолога Александра Иннокентьевна Санникова салайан ыытта.
Дебаты үксүгэр өй оонньуута эбэтэр күрэс диэн ааттыыллар. Бүгүн оҕолор араатардыыр дьоҕурдарын, ырытан толкуйдааһын үөрүйэхтэрин, кэпсэтиини ыытар уонна утарылаһааччы дакаастабылыгар түргэнник эппиэттиир дьоҕурдарын сайыннардылар.
Ньургун Романов, VII кылаас, «Эрчим» медиакиин, Дүллүкү орто оскуолата, Үөһээ Бүлүү.