Кулун тутар 20 күнүгэр Таатта улууһугар биир улахан уонна үөрүүлээх бэлиэ түгэн буолан ааста. Өйү-санааны, билиини-көрүүнү, уус-уран дьоҕуру түмэр «Сатабыл» күрэхтэһии 10 сыллаах үбүлүөйүн бэлиэтээтэ.
Бу дьоһуннаах тэрээһиҥҥэ үс күүстээх хамаанда, бэйэлэрин бастыҥнарын көрдөрөөрү, мустубут дьон-сэргэ иннигэр күөн көрүстүлэр. «Сатабыл» күрэххэ барыта үс хамаанда кыттыына ылла: Уолба, Ытык Күөл, Туора Күөл.
Биһиги сүргэбит үрдүк, санаабыт күүстээх этэ. Төрөөбүт дойдубут Уолба күүһүнэн, ытык сирдэрбит тыынынан сүүмэрдэмммит курдук этибит. Күрэх тэриллиитэ олус үчүгэй, соруктара кэрэхсэбиллээх этилэр. Араас ыйытыыларга хоруйдаан, дьоҕурбутун көрдөрөн, сытыы өйбүтүнэн, түргэн туттуубутунан биирдиилээн түһүмэхтэргэ бастыҥнаан иһии — олус тыҥааһыннаах этэ.
Биһиги хамаандабыт биир кэлим буолан, бэйэ-бэйэбитигэр тирэх буолан, утарылаһааччыларбыт иннилэринэ чулуулаабыппыт. Күрэх түмүгүн дьүүллүүр сүбэ биллэрэрин кэтэһии олус долгутуулаах этэ. Тиһэҕэр, үөрүүлээх ытыс тыаһа уонна дьоллоох хаһыылар доҕуһуолларынан «Сатабыл» күрэх 10 сыллаах үбүлүөйдээх күрэҕэр биһиги хамаандабыт бастакы миэстэни ылла! Бу Уолба дьонун күүстээх үлэтин, билиитин, сатабылын, биир кэлим буолуутун көрдөрөр үөрүүлээх кыайыы!
Биһиги, Уолбалар, бу кыайыыбытынан дьоммут-сэргэбит, төрөөбүт дойдубут аатын үрдэтэн, үөрүүбүт муҥура суох.
Устя ЛАЗАРЕВА, Уолба орто оскуолатын 7 кылааһын үөрэнээччитэ, Таатта.
Кэскил14.ру