Биллиилээх государственнай, общественнай-политическай деятель Илья Егорович Винокуров 130 сылыгар анаммыт далааһыннаах тэрээһиннэр бүтүн өрөспүүбүлүкэ үрдүнэн киэҥник бэлиэтэнэн саҕаланнылар. Бүгүн, кулун тутар 17 күнүгэр, өрөспүүбүлүкэтээҕи медиа-киин саалатыгар общественниктары, суруналыыстары кытары көрсүһүү буолан ааста.
Ил Дархан Айсен Николаев Илья Егорович Винокуров 130 сылыгар анаммыт үбүлүөйдээх тэрээһиннэри ыытыыга тэрийэр кэмитиэт туһунан дьаһал биллэрэн турар, анал тэрийэр кэмитиэти Георгий Михайлов салайар. Дьаһал былаана уопсайа 8 тосхолтон турарын уонна 66 пууну киллэрэрин туһунан Нам улууһун аҕа баһылыга Юрий Слепцов көрсүһүү кэмигэр иһитиннэрдэ.
Пресс-конференцияҕа анаммыт тэрээһини Нам улууһун делегацията уонна СӨ инновацияҕа, цифровой сайдыыга уонна инфокоммуникационнай технологияҕа министиэристибэтэ иилээн-саҕалаан тэрийэн ыыттылар. Модераторынан Хатыҥ Арыы нэһилиэгин дьаһалтатын баһылыга Иван Ноговицын үлэлээтэ.
Кэпсэтиигэ Нам улууһун баһылыга Юрий Слепцов, «Нам түмсүү» общественнай тэрээһин бэрэссэдээтэлин солбуйааччыта, СӨ култууратын үтүөлээх үлэһитэ Гаврил Местников, историческай билим кандидата, СӨ култууратын туйгуна Пантелеймон Петров, историческай билим кандидата, Илья Егорович Винокуров үлэтин, олоҕун чинчийбит библиограф Егор Антонов, кыраайы үөрэтээччи, Өлөөн эбэҥки национальнай улууһун бочуоттаах олохтооҕо Наталия Сивцева кыттыыны ыллылар.
Көрсүһүү саха норуотун чулуу уолугар Илья Егорович Винокуровка анаммыт «Защитник судьбы своего народа» документальный киинэ көрдөрүүтүттэн саҕаланна.
Нам улууһугар ыытыллар улахан тэрээһиннэри өрүү бэйэлэрин уһулуччу нүөмэрдэринэн киэргэтэр, «Уоланнар ааҕыылара» өрөспүүбүлүкэтээҕи күрэх биэс төгүллээх кыайыылаахтара И.Е. Винокуров аатынан Хатыҥ Арыы орто оскуолатын «Чаҕылыс» уоланнар бөлөхтөрө «Дьон дьолун туһа олох» дьүһүйүүнү көрдөрдүлэр (салайааччы Анна Васильева).
Эдэр чинчийээччи, 2№-дээх Нам орто оскуолатын 3 кылааһын үөрэнээччитэ Николай Кривошапкин Илья Винокуров аатын үйэтитиигэ туһуламмыт үлэтин билиһиннэрдэ.
Коля төрөөбүт оскуолатыгар турар И.Е. Винокуровка анаммыт пааматынньыкка кини хаалларбыт суолун-ииһин видео оҥорон үйэтиппитин кюар-код көмөтүнэн тарҕаппытын билиһиннэрдэ. Маны таһынан кини сотору Москваҕа чинчийэр үлэтинэн кэмпириэнсийэҕэ кытта бараары сылдьарын этэн аһардылар.
Коля Кривошапкин оҥорбут видеотын кытары билсиҥ:
Тэрийэр хамыыһыйа былааннаммыт үлэтин барылын Нам улууһун баһылыга Юрий Слепцов билиһиннэрдэ. Кулун тутар 19 күнүгэр Саха сирин общественноһын улахан мунньаҕа Бырабыыталыстыба 1 №-дээх дьиэтигэр Республика саалатыгар буолаары турарын кини иһитиннэрдэ. Маны таһынан өрөспүүбүлүкэ бары оскуолаларыгар Винокуровскай ааҕыылар ыытыллалларын эттэ.
Быйыл Нам улууһугар Илья Егорович Винокуров 130 сылыгар аналлаах өрөспүүбүлүкэ таһымнаах үбүлүөйдээх Ыһыах ыытыллар. Маны таһынан Усуйаана улууһун Казачье орто оскуолатыгар И.Е. Винокуров аатын иҥэрэргэ үлэ бара турарын баһылык Юрий Иннокентьевич иһитиннэрдэ.
Ити курдук, үөрэх уонна сырдатыы, култуура, тыа хаһаайыстыбатын, медицина эйгэлэрин барытын хабар далааһыннаах үлэлэлэр ыытылла туралларын тэрийэр бөлөх билиһиннэрдэ. Саха сиригэр кэмнэммэт үтүөнү оҥорбут бөдөҥ общественнай уонна политическай деятель Илья Егорович Винокуров хатыламмат олоҕор, үлэлээбит суолугар-ииһигэр анаммыт үс кинигэ тахсыахтааҕын мустубут дьон үөрэ иһиттэ.
Илья Егорович Винокуров саха норуотун өйүгэр-санаатыгар Аҕа дойду сэриитин сылларыгар дьону-сэргэни аччыктаан өлөр дьылҕаттан быыһаабыт күүстээх салайааччы быһыытынан хаалбыта. 1943-1946 сс. Саха АССР норуодунай комиссардарын сэбиэтин бэрэссэдээтэлэ. 1946-1952 сс. Коммунистическай партия Дьокуускайдааҕы обкомун бастакы сэкирэтээрэ дуоһунаска үлэлээбитэ. Илья Егорович элбэх оскуоланы, медпууну, сэллик балыыһатын, санаторийы, ас-табаар ыскылааттарын, онтон да атын нэһилиэнньэҕэ наадалаах тутууну тэрийбит өҥөлөөх бөдөҥ салайааччы, саха норуота киэн туттар чулуу киһитэ.
Кэскил14.ру