Бүгүн, кулун тутар 13 күнүгэр, С.Н. Донской-II аатынан Үөрэҕи сайыннарар уонна идэ таһымын үрдэтэр институкка V төгүлүн ыытыллар «Төрөөбүт тыл уонна литэрэтиирэ бастыҥ учуутала» өрөспүүбүлүкэтээҕи күрэс түмүктэннэ, кыайыылаах аата ааттанна.
Бу үс күн тухары кыттааччылар үгүс элбэх тургутууну ситиһиилээхтик аастыллар. Мэтэдиичэскэй мастырыскыайтан саҕалаан маастар-кылааһы, айымьнылаах уруоктары көрдөрдүлэр. Бу күрэххэ өрөспүүбүлүкэбит саамай таһаарыылаах үлэлээх төрөөбүт тылын уонна литэрэтиирэтин учууталлара бэйэлэрин чаҕылхай билиилэрин, ураты сатабылларын-ньымаларын, кэпсэтэр-айар дьоҕурдарын, учуутал иннигэр турар соруктары айымньылаахтык, ситиһиилээхтик быһааралларын итэҕэтиилээхтик көрдөрдүлэр.
Үөрүүлээх быһыыга-майгыга кыттааччыларга анал номинациялары уонна спонсордар бириистэрин туттардылар. Ол курдук:
«Бастыҥ видеовизитка» анал аат:
- Сандаара Калистратовна Еремеева, Нам 2№-дээх орто оскуолатын саха тылын уонна литэрэтиирэтин учуутала;
- Инга Саввична Константинова, С.П. Данилов аатынан Бэрдьигэстээх орто оскуолатын алын сүһүөх кылааһын учуутала;
«Героическай эпоһы, фольклору харыстааһын, сайыннарыы, тарҕатыы» анал аат:
- Ульяна Афанасьевна Хоютанова, Чымынаайы орто оскуолатын саха тылын уонна литэрэтиирэтин учуутала
- Андрей Андреевич Федосеев, Усуйаана орто оскуолатын саха тылын, литэрэтиирэтин уонна ОБЗР учуутала;
- Матрена Егоровна Анисимова, Мастаах орто оскуолатын саха тылын, литэрэтиирэтин уонна төрүт култууратын учуутала;
«Үөрэх тэрилтэтигэр этнокултуурунай эйгэни тэрийии иһин» анал аат:
- Залина Петровна Сивцева, Амма орто оскуолатын саха тылын судаарыстыбаннай тыл быһыытынан үөрэтэр учуутала;
- Надежда Максимовна Очирова, «Арктика» оскуола-интэринээт эбээн тылын уонна литэрэтиирэтин учуутала;
- Алена Климовна Николаева, Токко орто оскуола-интэринээтин саха тылын уонна литэрэтиирэтин учуутала;
Күрэс инники сылларын түөрт кыайыылаахтарын анал бирииһэ:
- Валентина Иннокентьевна Тищенко, Лөгөй лиссиэй-интэринээтин саха тылын уонна литэрэтиирэтин учуутала;
Н.Е. Мординов-Амма Аччыгыйа аатынан «Кэскил» оҕо бэчээтин кыһатын анал бирииһэ:
- Валентина Игнатьевна Стручкова, Хатыстыыр орто оскуолатын эбэҥки тылын уонна литэрэтиирэтин учуутала;
Инга Саввична Константинова, С.П. Данилов аатынан Бэрдьигэстээх орто оскуолатын алын сүһүөх кылааһын учуутала:
«Биһиги үс күн устата күрэхтэстибит. Бу күрэхтэһии ураты, тоҕо диэтэр олус элбэх түһүмэхтээх уонна төрөөбүт тыл уонна литэрэтиирэ учууталларын күрэҕэ буолар. Бастакы күн туох баар санныгар сүгэ сылдьар, сыллар тухары үлэлээбит уопуккун кэпсиир олус долгутуулаах этэ. Иккис күҥҥэ уруок уонна кылаас чааһа ыыппыппыт. Бу барыта М.Е. Николаев аатынан Дьокуускай куораттааҕы 40-с нүөмэрдээх оскуолаҕа буолбута. Бары кыттааччыларга даҕаны, бу түһүмэх олус долгутуулаахтык ааспыта буолуо. Ол эрэн уруок ыытар кылааспыт оҕолоро олус сэргэх буоланнар барыта этэҥҥэ ааспыта. Күн иккис аҥарыгар кылаас чааһын ыыппыппыт. Биир күн икки түһүмэххэ кыттар оҕолорго да, кыттааччыларга да сылаалаах соҕус эбит. Ол да буоллар кылаас чааһа эмиэ үчүгэйдик ааспыта. Мин иитэр сыаллаах биэрбит тосхоллорбун оҕолор өйдөөтүлэр дии саныыбын. Үһүс күҥҥэ маастар кылаастары ыыттыбыт. Уопут үллэһиннибит. Ол кэнниттэн төрөөбүт тыл билиҥҥи туругун туһунан дискуссия-кэпсэтии буолбута. Бу күрэххэ бэлэмнэммиппит үһүс нэдиэлэтэ буолла. Мин бэйэм алын кылаас учуутала буолабын, ол эрэн саха тылыгар элбэх үлэлээхпин, саха тылын бэйэм таптыыбын, чинчийэр үлэҕэ оҕолору уһуйууга уонна бэйэм ааптарскай оонньууларым элбэхтэр диэн кыттарга санаммытым. Түмүгэ олус үчүгэй буолла. 6 бастыҥ учууталлар ахсааннарыгар киирии миэхэ улахан ситиһии. Атын кыттааччылар бары үчүгэйдэр. Бастыҥтан бастыҥ учууталлар кэлбиттэрин дьүүллүүр сүбэ эмиэ бэлиэтээтэ. Бэлиэтиэм этэ Валентина Иннокентьевна Тищенко, Зинаида Евсеевна Софронованы уонна бэйэтин төрүт тылын тарҕата, сайыннара сылдьар Надежда Максимовна Очированы, «Арктика» оскуола-интэринээт эбээн тылын уонна литэрэтиирэтин учууталын уонна эдэр кыттааччыны Валентина Игнатьевна Стручкованы».
Түмүктүүр тэрээһин саамай долгутуулаах чааһыгар Үөрэҕи сайыннарар уонна идэ таһымын үрдэтэр институт директорын эбээһинэһин толорооччу Юрий Егорович Шишигин кыайыылаах аатын ааттаата. Ол курдук, Саха өрөспүүбүлүкэтин 2026 сыл «Төрөөбүт тыл уонна литэрэтиирэ бастыҥ учуутала» күрэс муҥутуур кыайыылааҕынан Валентина Иннокентьевна Тищенко, Лөгөй лиссиэй-интэринээтин саха тылын уонна литэрэтиирэтин учуутала буолла.
Валентина Иннокентьевна Тищенко:
«Бэһис төгүлүн ыытыллыбыт «Төрөөбүт тыл уонна литэрэтиирэ бастыҥ учуутала» күрэс кыайыылааҕа буолбуппуттан соһуйдум, олус долгуйдум. Бу кыайыы кэлбитигэр миэхэ көмөлөспүт, миигин кытта тэҥҥэ сылдьыспыт Лөгөйүм лиссиэйин кэллэктиибигэр, учууталларыгар, хамаандабар уонна Кэптэним дьонугар уонна бүтүн Уус Алданым дьонугар махтанабын. Бу үс күн тухары тэҥҥэ күрэхтэспит кыттааччылар үлэлэрин олус сэргээтим. Чуолаан аҕыйах ахсааннаах хотугу омуктар тылларын үөрэтэр учууталлар сөҕүмэр үлэни оҥоро сылдьаллар эбит диэн санааҕа кэллим. Бу маннык учууталлар баалларыттан сүрдээҕин астынным. Уонна эдэр коллегаларым кэлэн кыттыбыттара кинилэргэ бастакы үктэл, салгыы үүнэллэригэр-сайдалларыгар, оҕону кытта алтыһалларыгар, оҕоҕо төрөөбүт тыл иччилээҕин, төрөөбүт тыл күүһүн, төрөөбүт тыл кыаҕын тиэрдэргэ бу күрэх эмиэ биир улахан ситиһии буолар. Кыайыылаах Арассыыйа таһымыгар баран Өрөспүүбүлүкэ чиэһин көмүскүүр диэн балаһыанньаҕа баар этэ, ол иһин кыттааччы барыта онно бэлэм сылдьыбыта буолуо. Биллэн турар, бу улахан эппиэтнэс. Мин онно баран дойдубун, Сахам сирин тиийэн көрдөрүөхтээхпин уонна төрөөбүт тылым хайдах курдук манна туттулларын, суолталааҕын уонна биһиги хайдах үөрэтэрбитин бүттүүн Саха сирин учууталларын ааттарыттан кыттабын диэн санаа баар. Билигин ылан этэргэ олус ыарахан. Билигин соһуйуу, үөрүү уонна махтал эрэ тыллара үөскүүллэр».
Бары күрэс кыттыылаахтарыгар ситиһиилээх үлэни, бастыҥ үөрэнээччилэри баҕарабыт!
кэскил14.ру