Ньурба оройуонун оскуолаларын иһигэр үгэскэ кубулуйбут Н.И. Харитонов-Николай Чуор аатынан «Кыталык» култуура дыбарыаһыгар III төгүлүн ыытыллар «Звездный класс» күрэх быйыл олунньу 18 күнүгэр өссө үрдүк таһымнаахтык уонна чаҕылхайдык ыытылынна. Бу тэрээһин оҕолор айар талааннарын арыйарга, кэрэҕэ-сырдыкка тардыһыыларын күүһүрдэргэ улахан суолталаах. Күрэххэ оройуон 11 оскуолатыттан барыта 16 кылаас кыттан, вокал, хореография уонна художественнай тыл хайысхаларынан киэҥ көрүстүлэр.
Кырачаан үөрэнээччилэртэн саҕалаан, 11 кылаас үөрэнээччилэригэр тиийэ оҕолор бэйэлэрин кылаас салайааччыларын кытта бэлэмнээбит сэргэх нүөмэрдэрин туруоран, дьон-сэргэ сүргэтин өрө көтөхтүлэр, көрөөччүлэри үөртүлэр-көтүттүлэр. Сыанаҕа үөрэнээччилэр эрэллээхтик, дьулуурдаахтык тахсыылара, кинилэр айар дьоҕурдара хайдах сайдарын көрдөрдө.
Биһиги оскуолабытыттан бу күрэххэ 1, 5 уонна 11 кылаас үөрэнээччилэрэ көхтөөхтүк кыттыыны ыллылар. Күрэх түмүгүнэн биһиги оҕолорбут үрдүк ситиһиилэри көрдөрдүлэр: 1 кылаас үөрэнээччилэрэ, кылаас салайааччыта Марианна Михайловна Анохина, «Букубаар», көхтөөх кыттыы иһин бэлиэтэннилэр. 5 кылаас үөрэнээччилэрэ, кылаас салайааччыта Оксана Эдуардовна Иванова, «казахский танец» нүөмэрдэринэн III миэстэни ылары ситистилэр.
Оттон 11 кылаас үөрэнээччилэрэ, кылаас салайааччыта Мария Владимировна Мостахова, «Сайылык» диэн кэрэ нүөмэрдэринэн күрэххэ Гран-при үрдүк аатын ылан барыларын үөртүлэр!
Бу курдук тэрээһиннэр оҕолор талааннарын сайыннараллар, бэйэлэригэр эрэли үөскэтэллэр, кистэлэҥ дьоҕурдарын арыйаллар. Саамай сүрүнэ – биир кэлим буолууну, кылаас оҕолорун уонна салайааччытын ыкса ситимин күүһүрдэллэр.
«Звездный класс» күрэх инникитин даҕаны үөрэнээччилэри үөрдэ, айар дьоҕурдарын уһугуннара турдун! Барҕа махтал тэрээһини тэрийээччилэргэ, кылаас салайааччыларыгар уонна бары кыттааччыларга!
Александр ФЕДОРОВ,
К.Д. Уткин аатынан Марха орто оскуолатын 11 кылааһын үөрэнээччитэ,
«Уткин сонуннара» медиа-киин эдкора.
keskil14.ru