Бэҕэһээ Дьокуускайга “Розовая чайка” эдэр мусукааннар норуоттар икки ардыларынааҕы I аһаҕас куонкурустара саҕаланна. Тэрээһин арыллыытыгар «Голос. Дети» кыайыылааҕа уонна “Юная звезда” ырыа куонкуруһугар Саха Өрөспүүбүлүкэтин аатыттан кыттыбыт Валерий Кузаков Дьокуускайга кэлэн ыалдьытаата.
«Муусука барыбытыгар: норуоттар икки ардыларынааҕы маастар-кылаастартан — норуоттар икки ардыларынааҕы куонкурустарга» III кэнгириэс чэрчитинэн ыытыллар «Розовая чайка» норуоттар икки ардыларынааҕы I аһаҕас куонкурус «Муусука барыбытыгар» бырайыак саҕаламмыта бэһис сылыгар, В.А.Босиков аатынан Муусука үрдүкү оскуолата төрүттэммитэ 25 сылыгар ананар. Онон, эппиэтинэс хас да бүк улахан.
Суорун Омоллоон аатынан Опера уонна балет тыйаатырыгар күнүс 11 чаастан куонкуруһу үөрүүлээхтик аһыы сиэригэр-туомугар сааланы толору киһи мустубут. Манна араас дойдулартан – Соҕуруу Кэриэйэттэн, Кытайтан, Японияттан, АХШ-тан, Арассыыйа куораттарыттан – Москваттан, Санкт-Петербургтан, Владивостоктан тиийэ уонна, биллэн турар, Саха Өрөспүүбүлүкэтин араас улуустарыттан, Дьокуускай куораттан куонкурус кыттыылаахтара, дьүүллүүр сүбэ чилиэттэрэ бааллар.
Саха Өрөспүүбүлүкэтин аатыттан кыттыбыт Валерий Кузаков куонкурус таһымын лаппа үрдэттэ. Кини төрөппүттэрэ Саха сирин олохтоохторо: аҕата Дьокуускайтан, ийэтэ Өлүөхүмэттэн төрүттээхтэр. Уолчаан Саха сиригэр төрөөбүт эрээри, быыкаа эрдэҕинэ дьоно Москваҕа көһөн барбыттар.
Кини, «Symphonica ARTica», Саха сирин Филармониятын хора, Италия дирижёра Кристиан Делисо уонна Кэриэйэ скрипачката Лим Со Рин буолан, бэртээхэй нүөмэри бэлэхтээтилэр. Валерийы уонна кини төрөппүттэрин кытта интервьюну «Кэскил» хаһыат кэлэр нүөмэригэр ааҕыҥ!