Бүгүн Саха Сирин олохтоохторун болҕомтото Ил Дархан Айсен Сергеевич Николаев СӨ Судаарыстыбаннай Мунньаҕар сыллааҕы Туһаайыытыгар уурулунна. Өрөспүүбүлүкэ социальнай-экономическай сайдыытын сүрүн хайысхалара эрэ буолбакка, киһи капиталын сайыннарыы, ол иһигэр үөрэхтээһин уонна иитии боппуруостара ураты миэстэни ыллылар.
Ил Дархан бэйэтин Туһаайыытыгар үөрэх эйгэтин үлэһиттэригэр улахан эрэли уурда. Кини оҕо сайдарыгар, талаанын арыйарыгар усулуобуйаны тэрийии, учуутал идэтин таһымын үрдэтии уонна патриотическай иитии күүһүрүөхтээҕин бэлиэтээтэ. Биһиги оскуолабыт учууталлара бу Туһаайыыны истэн, бэйэлэрин санааларын үллэһиннилэр.
Учууталлар санаалара:
Елена Николаевна, алын кылаас учуутала:
Ил Дархан Туһаайыытыгар оҕо сааһы харыстааһын уонна дьиэ кэргэн сыаннастарын бөҕөргөтүү туһунан этиитэ олус чугас. Биһиги, алын кылаас учууталлара, оҕо олоххо бастакы хардыыларын оҥороругар төрөппүттэри кытта ситимнээхтик үлэлиэхтээхпит. Айсен Сергеевич үөрэх матырыйаалынай базатын тупсарыыга уонна саҥа оскуолалары тутууга улахан болҕомтону уурара үөрдэр. Бу барыта оҕо сайдарыгар кэрэ кэскили түстүүр.
Яна Ариановна, саха тылын уонна литэрэтиирэтин учуутала:
Ил Дархан төрөөбүт тылбытын уонна үгэстэрбитин чөл хаалларыы, сайыннарыы туһунан этиитэ сүрүн суолталаах. Саха Сирин кэскилэ тылынан уонна култууранан иитиллибит ыччакка баар. Биһиги үлэбит бу стратегическай соругу толорууга быһаччы дьайар диэн өйдүүбүт уонна ол туһугар күүспүтүн уурабыт.
Степан Иванович, информатика учуутала:
Билиҥҥи үйэҕэ технология сайдыыта үөрэхтээһини кытта арахсыспат ситимнээх. Ил Дархан Туһаайыытыгар цифровой экономиканы уонна үрдүк технологияны баһылыыр ыччаты бэлэмнээһин туһунан эппитэ биһигини, техническай хайысхалаах учууталлары, саҥа кыайыыларга көҕүлүүр.
Ил Дархан үөрэх эйгэтин үлэһиттэрин уопсастыбаҕа оруоллара үрдүк буолуохтааҕын өссө төгүл бигэргэттэ. Учууталга уонна иитээччигэ судаарыстыба өттүттэн өйөбүл баара үлэбитигэр эрэли уонна күүһү биэрэр. Биһиги сорукпут — Туһаайыыга этиллибит сүрүн идиэйэлэри олоххо киллэрэн, киэҥ биллилээх, талааннаах уонна чиэстээх ыччаты иитэн таһаарыы.
Кэскилээнэ Николаевна, дириэктэр иитэр үлэҕэ сүбэһитэ:
Лилиана Попова,
Ф.Г. Охлопков аатынан Майа орто оскуолатын 10 «б» кылаас үөрэнээччитэ,
«Түмэн» медиа киин кэрэспэдьиэнэ.
keskil14.ru