Ахсынньы 13 күнүгэр Дьокуускайга ХИФУ историческай факультетыгар оскуола оҕолоругар өрөспүүбүлүкэтээҕи Гавриловскай ааҕыы ыытылынна. Бу тэрээһин биһиги биир дойдулаахпыт Кузьма Осипович Гаврилов төрөөбүтэ 135 сааһыгар уонна Аҕа Дойду көмүскээччилэрин сылыгар ананна.
Ааҕыыларга барыта 104 оҕо Чурапчыттан, Намтан, Амматтан, Мэҥэ Хаҥаластан, Дьокуускай куорат оскуолаларыттан кытыннылар. Кэмпириэнсийэҕэ биир дойдулаахтарбыт СӨ дьаһалтатын Бырабыыталыстыбатын олохтоох салайыыны боппуруостарыгар Департаменын салайааччыта Иван Романович Попов, СӨ ГАУ Аан дойдутааҕы бырайыактары салайар салаа салайааччыта Федор Федорович Белолюбскай, улууспут тыа хаһаайыстыбатын салалтатын салайааччытын солбуйааччы Александр Ярославович Борисов, Историческай факультет декана Наталья Анатольевна Стручкова, нэһилиэкпит баһылыга Айаан Ньургунович Чичахов оскуолабыт улэhиттэригэр махтал суруктары туттардылар, оҕолорго ситиһиини, эҕэрдэ тыллары эттилэр.
Барыта 5 хайысха күн устата үлэлээтэ: география уонна экология, история, экономика, филология уонна краеведение.
Быйыл саҥа интерактивнай чинчийэр күрэх «Полит-портрет: К.О. Гаврилов» диэн Историческай факультет научнай куруһуогун устудьуоннара тэрийбит күрэхтэригэр хамаанданан күрэхтэстилэр.
Кэмпириэнсийэ экспертэринэн уопуттаах билим үлэһиттэрэ, үрдүк тэрилтэлэр бэрэстэбиитэллэрэ үлэлээтилэр.
Ааҕыы түмүгүнэн Филология секциятыгар Лауреат үрдүк аатын Мэҥэ Хаҥалас Хорообут орто оскуолатын 9 кылааһын үөрэнээччитэ Юрий Жирков ылла.
Саамай элбэх оҕо кыттыбыт История секциятыгар Дьокуускай куорат 39 нүөмэрдээх орто оскуолатын 8б кылааһын үөрэнээччитэ Елизавета Окорокова, Краеведение секциятыгар Дьокуускай куорат классическай гимназитятыттан Полина Яковлева, География уонна Экология секциятыгар Мэҥэ Ханалас Тиэлиги орто оскуолатын 8 кылааһын үөрэнээччитэ Вия Александрова, Экономика секциятыгар Бутэйдээх орто оскуолатын 8 кылааһын үөрэнээччитэ Данил Соловьев Лауреат үрдүк аатын сүктүлэр.
Бу оҕолор бары сүрдээх интэриэһинэй, дириҥник чинчийиллибит научнай дакылааттара экспердэр интэриэстэрин, сэҥээриилэрин ылла, өссө да үлэлэрин кэҥэтэллэригэр ситиһиини баҕардылар.
Бу ааҕыылар көлүөнэлэр алтыһыыларыгар, кэпсэтиилэригэр тыыннаах былаһаакка, кэм ситимэ буолар. Кузьма Осипович Гаврилов сырдык өйдөбүлэ эдэр көлүөнэни инникигэ эрэллээх буоларга, ыччаттар көҕулээһиннэрин сайыннарыыга өрө көтөҕөр, кынаттыыр.
Биһиги биир дойдулаахпыт, суруйааччы, экэнэмиис, уопсастыбаннай диэйэтэл, кооператор, сталинскай репрессия сиэртибэтэ Кузьма Осипович Гаврилов аата умнуллубат. Кини аатынан үгэс буолбут ааҕыылар оскуолабыт үөрэнээччилэрэ сайдалларыгар, чинчийэр үлэни көҕүлүүргэ, оҕолор аһаҕастык тахсан саҥара үөрэнэллэригэр күүс буолар улахан суолтаталаах.
Регина Ефимова, Бутэйдээх орто оскуолатын 11 кылааһын уорэнээччитэ.