«Кэскил» медиа-оскуолаҕа өрөспүүбүлүкэ үрдүнэн 500-тэн тахса оҕо дьарыктанар. Бастыҥ үлэлээх юнкордар Ил Дархан Харыйатыгар Айсен Сергеевич Николаевы кытта көрсөн кэпсэтэр үрдүк чиэскэ тиксэр. Бу «Кэскил медиа-оскуола биһиэхэ, юнкордарга, анаан ыытар үтүө үгэһэ буолар.
Ахсынньы 20 күнүгэр буолан ааспыт Ил Дархан Харыйатыгар алта бастыҥ юнкордар кэккэлэригэр киирэммин, өрөспүүбүлүкэбит Ил Дарханын Айсен Сергеевич Николаевы кытта кэпсэтэр чиэскэ тигистим.
Биллэрин курдук, ааһан эрэр 2025 сыл Арассыыйаҕа Аҕа дойдуну, Саха Өрөспүүбүлүкэтигэр Ийэ дойдуну көмүскээччилэр сыллара.
Мин бэйэм түөрт геройдаах Танда нэһилиэгин оскуолатыгар үөрэнэбин. Ил Дархаҥҥа биэрбит ыйытыыбын дойдубутугар буола турар анал байыаннай дьайыылары кытта сибээстээн биэрдим. Дойдуну көмүскээһин ытык дьыала төрүт өбүгэлэрбитин кытта сибээстээх. Билигин буола турар анал байыаннай дьайыылар, кинилэргэ көмөлөһөр волонтерскай хамсааһын кыттыылаахтарын эһэлэрэ, хос эһэлэрэ 1941-1945 сс. Аҕа дойду Улуу сэриитигэр дойдуларын көмүскээбиттэрэ. Манан сирдэтэн Айсен Сергеевичтан патриотическай өй-санаа, хорсун быһыы холобурун өссө хайдах дириҥэтэн бэйэбит саастыы оҕолорбутугар тиэрдиэхпитин сөбүн туһунан санаатын үллэстэригэр көрдөстүм.
Айсен Сергеевич: «Түөрт геройдаах Тандаттан сылдьар юнкор манна кэлэн тураргыттан наһаа үөрэбин. Биир кыра дэриэбинэттэн нэһилиэги, улууһу эрэ буолбакка бүтүн Саха сирин аатырдыбыт дьоннор үүнэн тахсыбыттарын Танда холобуругар көрөбүт: Бартыһаан Дьөгүөрэп, Сэбиэскэй Сойуус Геройа Владимир Лонгинов, биһигини кытта бииргэ үлэлии сылдьар Үлэ Геройа Михаил Готовцев, анал байыаннай дьайыылар саамай арылхай геройа «Алеша» танк экипаһын чилиэнэ Алексей Неустроев. Кинилэр бары биир сиртэн үүнэн тахсаннар биһиги дойдубут киэн туттар дьонноро буолаллар», — диэн эттэ.
— Мин санаабар, бу барыта иитииттэн, төрөөбүт дойдуга, алааска, нэһилиэккэ тапталтан тахсар: улахан дьыала кыраттан саҕаланар. Патриотическай иитии диир буоллахпытына, оҕолорбут дойдуларыгар бэриниилээх буолуохтарын баҕарар буоллахпытына, аан бастаан төрөөбүт, үөрэнэр сирдэрин историятын үчүгэйдик үөрэтэн, кимнээх үлэлээн ааспыттарын, ханна, хаһан туох үчүгэй буолбутун, туох ситиһиилэрдээхтэрин, төрүт алаастарбытын, күөллэрбитин, өрүстэрбитин билэн, дойдуга таптал тыынын иҥэриэхтээхпит. Ол түмүгэр Сахабыт сирин, улуу Россиябытын таптыыр, кинилэргэ бэриниилээх дьоннор үүнэн тахсаллар. Билигин Россия Саха сирэ хорсун дьоннордооҕунан сөҕөр даҕаны, махтайар даҕаны, махтанар даҕаны. Бу курдук өрүү буолуо диэн эрэллээхпит. Биһиги оҕолорбут дойдуларын таптыыр патриот дьон буолуохтара диэн эрэнэбин, — диэн санаатын үллэһиннэ.
Онтон биһиги Айсен Сергеевичка кырдьык, күүстээх, чаҕылхай, дойдубутугар бэриниилээх дьон буолуохпут диэн эрэннэрэбит.
Валерия ГОТОВЦЕВА, XI кылаас, М.Н. Готовцев аатынан Танда орто оскуолата, Уус Алдан