Ахсынньы 20 күнүгэр Сахабыт сирин циркатыгар сылын ахсын ыытыллар Ил Дархан Харыйата буолан ааста. Бу дьоһуннаах тэрээһиҥҥэ өрөспүүбүлүкэбит араас муннуктарыттан бастыҥ үөрэнээччилэр талыллан, ыҥырыллан кэлэн, үөрэн-көтөн бардылар. Мин бу үөрүүлээх бырааһынньыкка «Кэскил» медиа-оскуола юнкорун быһыытынан кыттыбыппыттан олус үөрдүм, долгуйдум.
Үөрүүлээх бырааһынньыгы цирка артыыстара оҕо сааспыт остуоруйаларыгар олоҕуран «Книга чудес» диэн Саҥа дьыллааҕы цирковой туруоруунан саҕалаатылар.
Бу туруоруу нуучча уонна хотугу омуктар остуоруйаларыгар олоҕуран оҥоһуллубут.
Мин санаабар, 2026 сыл Арассыыйаҕа биллэриллибит норуоттар сомоҕолоһууларын сылларыгар араас омуктар остуоруйаларын алтыһыннара туппуттара саамай сөп.
Иванушка, Хаарчаана кыыс, Емеля, Кощей Бессмертный, Дьэгэ-Бааба, Жар-птица, Змей Горыныч курдук оҕо сааспыт остуоруйаларын геройдарын цирка артыыстарын толорууларыгар көрөр миэхэ ураты буолла.
Саҥа дьыл буолаары турдаҕына Кощей Хаарчаана кыыһы уоран ылар. Тыа кыыллара айманаллар — Саҥа дьыл Хаарчааната суох хайдах да буолбат! Инньэ гынан, Ваня уолу уонна сур бөрөнү Хаарчаананы быыһыырга ыыталлар. Ыраах-ыраах уустук моһоллоох айаҥҥа кинилэри Дьэгэ-Бааба, Емеля, Жар-птица, Змей Горыныч көрсөллөр.
Онтон сир саамай тымныы чыпчаалыгар тиийэн, алмаас тааһы ылаллар. Кощейгэ тиийэннэр кинини үтүө өттүгэр көһөрөннөр, Хаарчаананы быыһыыллар. Быыһаабыттарын кэннэ Тымныы Оҕонньор сиэнин Хаарчааналыын уонна Чысхаан Хаарчаанатынаан Харыйа уотун уматан, Саҥа дьылы бэлиэтииллэр.
Бу барыта цирковой нүөмэрдэринэн — салгыҥҥа көтө сылдьар воздушнай гимнастиканан, акробаттарынан, жонглердарынан уратытык көһүннэ. Өссө дресированнай кыыллар киирбиттэрэ астык буолла. Мин ордук аттары астынным. «Ay Yola» башкирскай бөлөх хит буолбут «Хомай» ырыаларын киллэрбиттэрин сөбүлээтим.
Цирковой туруорууга доҕордуу сыһыан, үтүө санаа көстөр. Ил Дархан Харыйатыгар оҕо сааспыт остуоруйаларыгар эргиллэн дьикти алыптаах түгэҥҥэ куустаран ыллыбыт, элбэх да элбэх сырдыгы иҥэриннибит.
https://vkvideo.ru/video-199463452_456244295?list=c7a6b44cb332ddbc2f
Саҥа дьылы көрсө кэрэ бэлэх буолла. Оҕо сааспыт остуоруйалара олохпутун киэргэттэ.
Комила АРЖАКОВА, XI кылаас,
А.П. Илларионов аатынан
Хайахсыт орто оскуолата, Чурапчы
Ааптар хаартыскалара