Ахсынньы 10 күнүгэр биһиги оскуолабыт 4 кылааһын үөрэнээччилэрэ ураты суолталаах кылаас чааһын ыыттылар. Биһиги нэһилиэкпит,улууспут киэн туттар, үйэлээх үтүө үгэстэрин салҕыыр, ытык кырдьаҕаспытыгар, Павлов Егор Авксентьевичка анаммыта.
Кылаас чааһын сүрүн сыала – оҕолору үлэни ытыктыырга, нэһилиэк үлэһит дьонун холобуругар иитии этэ. Оҕолор үлэ туһунан хоһооннору ааҕан, ыйытыы биэрэн, ырытан, Егор Авксентьевич курдук үлэһит киһи буоларга баҕа санааларын үллэһиннилэр.
Кылаас чааһыгар ыалдьытынан кэлбит Павлов Егор Авксентьевич – культура эйгэтин үтүөлээх үлэһитэ, элбэх наҕараадалаах, биһиги киэн туттар киһибит. Егор Авксентьевич оҕолорго бэйэтин олоҕун, үлэтин туһунан кэпсээтэ. Оҕо эрдэҕиттэн үлэҕэ сыстаҕаһын, ханнык идэлэри баһылаабытын, олоххо умнуллубат түгэннэрин үллэһиннэ. Эдэр ыччакка үлэни таптыырга, бэйэ кыаҕын толору туһанарга сүбэлэрин биэрдэ.
Оҕолор Егор Авксентьевичка элбэх ыйытыы биэрдилэр. Нэһилиэккэ кини тугу уларыппытын, туох ситиһиилэрдээҕин интэриэһиргээтилэр. Егор Авксентьевич эйэҕэс, сэмэй майгытынан оҕолор сүрэхтэрин сүүйэ тутан, улаханнык астыннылар.
Кылаас чааһын түмүгэр оҕолор Егор Авксентьевичка махтал тылларын эттилэр. Кылаас салайааччыта Максимова Т.И. маннык тэрээһин оҕо аймахха улахан суолталааҕын, үлэһит буоларга баҕа санааларын күүһүрдэрин бэлиэтээтэ.
Маны таһынан, бу кылаас чааһа биһиги нэһилиэкпит эдэр көлүөнэтин патриотическай тыыҥҥа иитэргэ, нэһилиэкпит историятын билиһиннэрэргэ улахан суолталаах буолла. Павлов Егор Авксентьевич курдук үлэһит дьоммутунан киэн туттабыт уонна кинилэр холобурдарыгар эдэр ыччат иитиллиэҕин баҕарабыт!
Сайаана Терехова, 11 кылаас
«Дьоҕур» медиакиин, Кэбээйи орто оскуолата
Хаартыскаҕа: 4 «б» кылаас оҕолоро Егор Авксентьевичтыын