Ахсынньы 9 күнүгэр Бүтүн Арассыыйа үрдүнэн Аҕа дойду Дьоруойун күнэ бэлиэтэнэр. Ол үгэстэн туораабакка, ахсынньы 10 күнүгэр Дьокуускай куоратын 17 нүөмэрдээх орто оскуолатыгар Хорсун санаа кылааһын чааһа ыытылынна. Оскуолабыт 10 кылааһын оҕолоро бары мустан дойдубут
көмүскэлигэр сылдьыбыт анал байыаннай дьайыы кыттыылаахтарын кытта истиҥник көрүстүлэр.
Тэрээһиҥҥэ кыттыыны ыллылар: Горохов Сергей Егорович уонна Кутугутов Радимир Николаевич – анал дьайыы бэтэрээннэрэ, Абрамова Владилена Дмитриевна — СӨ « Аҕа дойдуну көмүскээччилэр» анал дьайыы кыттыылаахтарын өйүүр государственнай пуондатын социальнай координатора уонна Бережнева Елена Владимировна. Киирии тылынан оскуолабыт дириэктэрэ Чиряев Анатолий Николаевич арыйда. Анал дьайыы бэтэрээннэрэ бастаан бэйэлэрин туһунан билиһиннэрдилэр.
Горохов Сергей Егорович 1979 сыл төрүөх, Уус-Алдантан төрүттээх, үрдүк юридическай үөрэхтээх. Кини 2023 сыллаахха контракт суруйсан нацистары кытта сэриилэһэ барбыт. Ол иннинэ УФСИН-ҥа өр сыл үлэлээбит, майор. Кыргыһыы хонуутугар көрдөрбүт хорсун уонна харса суох быһыытын иһин “Хорсун быһыы” уордьанынан наҕараадаламмыта. Оскуола эрдэҕиттэн спордунан дьарыктанар эбит, ордук көҥүл тустуунан үлүһүйбүт. Ахсынньы ыйга улаханнык бааһыран төннөн кэлбит, билигин саппааска тахсыбыт.
Кутугутов Радимир Николаевич, 1986 сыллаахха төрөөбүт, эйэлээх кэмҥэ дьиэ тутуутунан дьарыктаммыт, байыаннай дьайыы бэтэрээнэ, дьиэтигэр доруобуйатынан эмсэҕэлэнэн төннүбүт. Радимир Николаевич 2023 сыллаахха «Ахмат» диэн спецназка бэйэтэ көҥүл өттүнэн тылланан
сэриилэһэ барбыт. 2024 сыллаахха РФ Оборона министерствотын кытта контракт суруйсан матроһунан 155 гвардияҕа сулууспалаабыт. “Хорсунун иһин” мэтээлинэн наҕараадаламмыта. Иккитэ улаханнык бааһыран инбэлииккэ тахсыбыта.
Кылаас чааска саха буойуннара төрөөбүт дойдуттан ыраах тэлэһийэ сылдьан хайдах курдук ыараханын, тулуурдаах, эр санаалаах буоларга, омугуттан тутулуга суох бары бииргэ түмсүүлээнэргэ олох үөрэтэрин, доҕордуу-атастыы сыһыан туһунан аһаҕастык кэпсээтилэр. Оҕолор иһийэн бэтэрээннэр сэһэргииллэрин иһиттилэр. Манна мустубут оҕолор, учууталлар интэриэһиргээбит ыйытыктарын биэрдилэр. Анал дьайыы буойуттара бэйэлэрэ олус сэмэй дьон эбит, ыйытыктарга толору, хайдах баарынан кырдьыктыы кэпсээтилэр.
Бу кэпсэтии кэннэ улахан кылаас оҕолоро Ийэ дойдуга ытык иэс, дойдуга таптал, бэриниилээх буолуу диэн сүрүн өйдөбүллэри иҥэриниэхтэрэ диэн эрэнэ хааллыбыт. Кылаас чааһы Владилена Дмитриевна уот сэриигэ кыттыбыт уолаттар тустарынан иһирэхтик этэн оҕолорго Аҕа дойдуну таптыырга, араас сымыйа информацияларга итэҕэйбэттэригэр, дьиҥнээх дьон холобуругар үөрэнэллэригэр сүбэтинэн түмүктээтэ. Кэлбит ыалдьыттарбытыгар оскуола аатыттан Анатолий Николаевич махтал сурук уонна сэмэй бэлэхтэри туттарда.
Арина КОЛОДЕЗНИКОВА,
Дьокуускай 17 № орто оскуолата, «Сайдын» медиакиин корреспондена