Ахсынньы 11 күнүгэр биһиги оскуолабытыгар саханы саха гыммыт, өбүгэлэрбит былыр-былыргыттан ытыктыыр астарын астыырга үөрэнээччилэргэ маастар-кылаас ыытылынна.
Билигин оскуолаҕа оҕолору өбүгэ үгэһигэр үөрэтии олус күүскэ сайдан турар. Мэҥэ Хаҥалас улууһугар ыытылла турар «Уолу уоллуу, кыыһы кыыстыы иитии» бырайыак чэрчитинэн 8 уонна 10 кылаас кыргыттара саха төрүт аһын астыырга кыттыыны ыллылар. Ол курдук, кинилэр сүөһү очоҕоһун сууйан, үрэн, хаан кутарга үөрэннилэр. Оттон бу очоҕостору кыргыттарга оскуолабыт уолаттара бэйэлэрэ сылгыны астаан бэлэмнээбиттэрэ.
Маастар-кылааһы оскуолабыт асчыттара ыыттылар. Үөрэнээччилэргэ барытын кэпсээн, ымпыгар-чымпыгар диэри көрдөрдүлэр. Бу курдук өбүгэлэрбит төрүт минньигэс астарын билэрбит олус туһалаах уонна суолталаах. Маастар-кылаас түмүгүнэн кыргыттар бары олус үөрдүлэр, элбэҕи билэн-көрөн, дьиэлэригэр тарҕастылар. Онон, бырайыакпыт сүрүн сыалын ситтэ.
Лилиана Попова, 10 «б» кылаас үөрэнээччитэ,
«Түмэн» медиа-киин кэрэспэдьиэнэ.
keskil14.ru