Сэтинньи 29 күнэ – саха норуотун поэта, Аҕа дойду Улуу сэрии кыттыылааҕа, Октябрьскай революция, Үлэ Кыһыл Знамята, Норуоттар доҕордоһуулара, «Бочуот Знага» уордьаннар кавалердара, ССРС Суруйааччыларын сойууһун чилиэнэ Серафим Кулачиков-Эллэй (1904-1976) төрөөбүтэ 121 сыла.
Серафим Романович – саха поэзиятын бөдөҥ маастара, 20-тэн тахса кинигэ ааптара. Кини саха сирин суруйааччыларыттан бастакынан норуот поэтын аатын сүкпүтэ.
С.Р. Кулачиков-Эллэй аатын сүгэр Чычымах орто оскуолатын музей-хоһугар поэкка аналлаах быыстапка турда уонна кылаас чаастара буоллулар.
1 кылаастарга «Сэтинньи 29 күнэ – Эллэй төрөөбүт күнэ» диэн тиэмэлээх кылаас чааска поэт оҕолорго анаан суруйбут айымньыларынан оҥоһуллубут үлэ тэтэрээттэрин билистилэр, кинигэлэри кэрэхсээн көрдүлэр. 2,3 кылаастар Эллэй оҕо сааһын, оҕолорго аналлаах айымньыларын кэпсэттилэр. Бэйэлэригэр элбэҕи, саҥаны арыйдылар. 7, 8 кылаас үөрэнээччилэригэр Амма нэһилиэгин музей-комплексын салайааччыта Мария Платоновна Табунанова Эллэй олоҕун, айар үлэтин олус дириҥник ырытан кэпсээтэ. Түмүккэ, биктэриинэ ыытыллыбытыгар оҕолор актыыбынайдык кытыннылар, ордук Каролина Гуляева элбэх боппуруоска сөпкө эппиэттээн хайҕанна. 9-с кылааска оҕолоро Эллэй төрөөбүт алааһын Мойуона, олорбут дьиэтэ музей-комплекс буолан турарын, төрөөбүт дойдутун туһунан хоһооннору билистилэр.
Биир дойдулаахпыт, норуот поэта Эллэй төрөөбүт күнүгэр10-с кылаастар «Саха» НКИК архыыбыттан видео көрдүлэр, Эллэй аймахтарынт ахтыыларын, төрөөбүт дойдутугар анаабыт айымньыларын аахтылар. Арассыыйаҕа Ийэ күнүгэр сыһыарын, Эллэй «Таптыаҕыҥ ийэни» ырыа буолбут хоһоонун Ольга Иванова толорбутун кытта тэҥҥэ ылластылар.
11-с кылаастар «Эллэй айымньыларыгар үлэни хоһуйуу» тиэмэҕэ Серафим Романович айар олоҕун тухары үлэни, айар-тутар үлэһит киһини айхаллаабытын уонна билигин үлэ-үөрэх суолтатын үрдүктүк сыаналаан кэпсэттилэр.
Ити курдук, оҕолор биир дойдулаахпыт Эллэй, төрөөбүт дойдубут туһунан өссө да билиилэрин хаҥата туруохтара, чулуу дьоннорбут ааттарын үйэтитэр, киэн туттар, ааҕар, суруйар, айар, чинчийэр дьоҕурын сайыннаран үтүө дьон буола улаатыахтара.
Дария ИВАНОВА, Чычымах, Таатта