Былырыын ахсынньы ый бүтэһик күннэригэр биһиги саҥа оскуолаҕа үөрэнэ киирэр дьоро күммүтүгэр биир бастакынан «Время выбрало нас…» диэн анал байыаннай дьайыыга аналлаах улахан уонна дириҥ ис хоһоонноох стендэ оҥоһуллубута уонна Герой паартата турбута. Герой паартатын биир санаанан геройдуу сэрии толоонугар охтубут выпускникпытыгар Иннокентий Марковка анаабыппыт.
Оскуолабыт аһыллар сиэригэр-туомугар тэҥҥэ Герой паартата арыллыбыта. Онно ийэтэ, кэргэнэ уонна оҕото кэлбиттэрэ. Тэрээһиҥҥэ СӨ Ил Дархана Айсен Николаев ыалдьыттыы кэлбитэ. Кини биһиги Геройбут уолугар кэлэн иһэр Саҥа дьылынан велосипед туттарбыта. Биһиги бары тэҥҥэ үөрбүппүт, ол эрэн үөрүүбүт харах уулаах этэ. Бу паартаны манна оскуола музейыгар хаалларбыппыт.
Анал Байыаннай Дьайыы хорсун буойуна, “Мужество” уордьан кавалера Иннокентий Марков биһиги оскуолабыт 2009 сыллаах выпускнига буолар. Кини биир бастакынан 2022 сыллаахха күһүн алтынньыга ыҥырыллан сэрии толоонугар Запорожскай хайысханан пулеметнай взвод наводчигынан кыргыспыта. Гвардийа младшай сержана этэ. Алтынньы 23 күнүгэр 2023 сыллаахха бойобуой сорудаҕы толоро сылдьан сырдык тыына быстыбыта.
Кини кылгас да буоллар чаҕылхай олоҕу олорбута. Кеша оскуолаҕа үөрэнэр сылларыгар олус эппиэтинэстээх уонна сэмэй майгылааҕа, доҕотторугар бэриниилээх, дьиэ кэргэнигэр баар суох көмө, дурда-хахха буола улааппыта -диэн кэпсиир учуутала Лидия Петровна. Оскуолатын ситиһиилээхтик үөрэнэн бүтэрэн түргэнник үлэһит буола охсоору Дьокуускайдааҕы тыа хаһаайыстыбатын техникумугар киирэн “земельно – имущественные отношения” диэн баһылаан дойдутугар Ытык Тааттаҕа кэлэн үлэлээн саҕалыыр. 2015-2016 сылларга аармыйаҕа радио-электроннай чааһын инженерно-маскировочнай взводугар сулууспалаан, Ийэ дойдутугар иэһин төлөөн, дойдутугар эргиллэн кэлэн ЕДДС тэрилтэтигэр үлэлии киирбитэ.
Иннокентий Марков Ийэ дойдутун таптыыра кини сэрии толоонугар хорсун быһыытыгар көстөр дии саныыбыт. Төһөлөөх бииргэ сылдьар табаарыстарын быыһабыта буолуой, хаста бэйэтэ бааһырбыта буолуой саамай сэрии толоонун бастакы күннэриттэн биир сыл устата? Ол эрэн хараҕар кыра уолчаана, төрөөбүт дойдутун кэрэтэ көстөн кэлэн күүс-күдэх эптэҕэ, дойдутугар таптала Герой оҥордоҕо. Дойдум инникитэ, ыраас халлаана диэн күүстээх санаанан иннин диэки баран истэҕэ.
Геройбутунан киэн туттабыт!
Дайаана Боярова, XI кылаас, А.Е.Мординов аатынан Тааттааҕы лиссиэй, Ытык Күөл