Эдэр кэскиллээх олоҥхоһут, «Саха» НКИХ «Олоҥхо-баттл» төрдүс бырайыагын кыайыылааҕа Никита Аянитов Ийэ олоҥхоһут Кирилл Никонович Никифоров-Лөкөчөөн «Хабыр киирсиилээх Хабытта Бэргэн» олоҥхотун Емельян Ярославскай аатынан Хотугу норуоттар устуоруйаларын уонна култуураларын холбоһуктаах түмэлин балаҕаныгар төбүрүөннээн олорон оруобуна 1 чаас кэриҥэ толордо. А.Д. Макарова аатынан Саха сиринээҕи култуура уонна ускуустуба кэллиэһин устудьуоннара кыттыылаах тэрээһин бүгүн, сэтинньи 26 күнүгэр, Олоҥхо декадатын чэрчитинэн ыытылынна.
Никита Аянитов М.К. Аммосов ХИФУ Арассыыйа хотугулуу-илиҥҥи норуоттарын тылларын, култуураларын үөрэтэр институтугар саха салаатыгар үөрэнэр, маны таһынан «Зёма» уопсастыбаннай хамсааһын бэрэссэдээтэлинэн таһаарыылаахтык үлэлиир, ол биир үтүө туоһута — бу соторутааҕыта ыытыллыбыт «Боотурдар оонньууларын» тэрээһинэ.
Никита төрдө-ууһа Үөһээ Бүлүү улууһа, Балаҕаннаах нэһилиэгэ, олоҥхону үс сааһыттан умсугуйан туран толоробун диэн киирбит ыйытыыга хоруйдаата. Бастакы уһуйааччыта Лена Николаевна Васильева, Никитаны уһуйаантан саҕалаан олоҥхо алыптаах абыгар сыһыаран уһуйбут. Бастакы толорбут олоҥхото «Эрэйдээх-буруйдаах Эр соҕотох» буолар. Онтон орто сүһүөх кылаастарга Кэнтиккэ Олоҥхо оскуолатыгар Сахаайта Мойтохоноваҕа дьарыктанан саҕалаабыт.
Былырыыҥҥы «Олоҥхо-баттлга» кыттыы уһунан Никита маннык диэн кэпсиир:
— Былырыын, дьиҥэр, кыайдым дии санаабытым. Биир баалынан хотторбутум. Олус хомойбутум, кыһыйбытым, этэргэ дылы дьиэбэр сытан эрэ муҥатыйбытым. Спортсмен хааным даҕаны оонньообута, «дьиҥэр кыайдым эрээри… тоҕо?…» диэн хайдах эрэ санаалар киирэтэлээбиттэрэ. Итинник муҥатыйа сылдьарбын учууталым Сахаайта Мойтохонова көрөн, «Айыыһыттаргын кэлэтиэҥ, Иэйэхситтэргин тэйитиэҥ. Хомойума, уоскуй, иккис миэстэ буоллуҥ, көрөөччү биһирэбилин ыллыҥ» диэбитэ. Онтон быйыл кыайан баран хайдах эрэ үөрбэтим даҕаны, хомойботум даҕаны, буолуохтааҕын курдук ылынным. Билигин санаан көрдөххө, өбүгэлэрим бэлэмнээбиттэр эбит миигин. Холобур, былырыын кыайан кэбиспитим эбитэ буоллар, этэргэ дылы, төбөм «эргийэн хаалан», «сулустаан» да хаалыам этэ. Быйылгы «Олоҥхо баттлга» саамай уустуга диэн идиэйэ толкуйдааһыныгар: үһүс сорудахха олоҥхону аныгытан көрдөрүүнү ыарырҕаппытым, чопчу толорооһунугар буолбакка, идиэйэ толкуйдууру.
Никита кыра эрдэҕиттэн ийэ уонна аҕа үөрүйэҕин иҥэринэ, үрүҥү уонна хараны араара улааппытын туһунан субу курдук кэпсиир:
— Мэник-тэник оҕо сылдьан, оҕо-оҕо курдук, тугу эмит куһаҕаны гынаҕын, холобур, алҕаска тугу эмит алдьатаҕын, ону аҕам «куһаҕаны оҥордоххуна, өллөхүнэ, аллараа абааһыларга барыаҕыҥ, онтон үчүгэйи оҥордоххуна, үтүөнү эрэ төрүттүү сырыттахха, үөһээ дойдуга барыаҕыҥ» диэн этээччи. Мин ийэлээх аҕабар улаханнык махтанабын. Кинилэр сахалыы эйгэни тылынан-өһүнэн, кэпсэтиинэн, истиҥ сыһыаннарынан, тапталларынан иҥэрбиттэрэ. Бэйэбин улахан, сиппит-хоппут күүстээх олоҥхоһуппун диэн санаммаппын, мин Кирилл Никонович Никифоровка-Лөкөчөөнөпкө үөрэммит дьоллоохпун. Кини олоҥхолорун ааҕар миэхэ чиэс-бочуот буолар. Олоҥхону толоруу диэн сүрүнэ тылы билиигэ сытар. Хайаан даҕаны үөһэттэн айдарыылаах буолуохтааххын диэн буолбатах, эн математик да буол, физрук да буол, тылы билии, тылы элбэхтик үөрэтии улахан оруоллаах, ону таптахха, олоҥхону ким баҕалаах толоруон сөп. Тылы билии баар хаһан баҕарар олох арылы аартыгын арыйан биэрэр суол.
Никита саамай уһуннук олоҥхону 2 чаас 48 мүнүүтэ толорбут. Онтон олоҥхоҕо саамай сөбүлээн толорор партията — Кыталык ырыата.
Өбүгэ ситимэ күүстээҕин эдэр олоҥхоһут бэлиэтээн аһарда. Удьуор утума өбүгэлэргин үөрэтииттэн, хаан аймахтаргын билииттэн, ийэҕэ, аҕаҕа тапталтан саҕылларын кини бэлиэтиир. Хайа баҕарар оҕо-аймах төрүччүтүн билиэхтээх, ону үөрэтиэхтээх диэн Никита этэр.
Ол туһунан видеоҕа көр:
keskil14.ru