Сэтинньи ый 22 күнүгэр Горнай улууһун килбэйэр киинигэр Бэрдьигэстээх нэһилиэгэр, Мэхээлэ Дьөгүөрэп аатынан Сынньалаҥ киинигэр сылын ахсын үрдүк таһымнаахтык ыытыллар «Мисс Горный-2025» кэрэ куолар күрэстэрэ буолан ааста.
Ол курдук, Одуну, Кировскай, Мытаах, Маҥаны уонна Бэрдьигэстээх нэһилиэктэриттэн сэттэ кыталык кыргыттар, кэрэ куолар биэс түһүмэҕинэн кииристилэр.
Маҥнайгы түһүмэххэ бэйэлэрин билиһиннэрдилэр. Кэрэчээн кыргыттарбыт уус-уран тылынан, хомоҕой хоһоонунан, бэл, омуктуу тылларынан бэйэлэрин тустарынан кылгастык сэгэтэн кэпсээтилэр.
Иккис түһүмэххэ кыттааччылар сахалыы тыыннаах аныгы дьыалабыай уобарастары көрдөрдүлэр. Манна кыргыттар дефиле устун хааман аастахтарын аайы, сүгүрүйээччилэрэ сааланы хаһыынан толороллоро, бэлэмнээбит плакааттара кыргыттарга төһүү күүс буоллулар.
Салгыы үһүс түһүмэххэ талба талааннарын, уран дьоҕурдарын Дьүүллүүр Сүбэҕэ көрдөрдүлэр. Киһи сөҕүөх, кыргыттарбыт олус да талааннаах эбиттэр! Мытаах нэһилиэгиттэн сылдьар Сандра Заубер анал байыаннай дьайыыга охтубут биир дойдулаахтарбытыгар анаан ырыа ыллаата. Маҥаны нэһилиэгиттэн кыттар Уруйдаана Чемезова бастаан утаа, синтезаторга, гитараҕа, барабааҥҥа оонньуу-оонньуу бэйэтин ырыатын толордо, онтон имигэс үҥкүүтүн көрдөрбүтэ – дьон сүргэтин көтөхтө. Одуну кэрэ куота Дайаана Сивцева аныгылыы тэтимнээх үҥкүүтэ дьон сэҥээриитин ылла. Кировскай кыыһа Диана Стручкова фортепианоҕа матыып толордо, үҥкүүнээн киэргэтэн биэрдэ. Бэрдьигэстээх нэһилиэгиттэн кыттар кыргыттар Милена Богданова удаҕан үҥкүүтүн, Сандаара Терентьева ис киирбэх ырыатын көрдүбүт-иһиттибит.
Оттон Милена Данилова, С.П. Данилов аатынан Бэрдьигэстээх оскуолатын выпускницата, билигин В.А. Вонгродскай аатынан медколледж устудьуонката, мейкап, визаж, косметология эйгэлэрин сэҥээрэр, кэрэхсиир, ол хайысхаларга элбэх ситиһиилэрдээх буолан, биэс араас норуоттар мейкаптарын оҥорбутун, модельлар хааман көрдөрдүлэр. Милена, чахчы даҕаны, кыргыттар кэрэ лэрин таба көрөн, өссө тупсаран биэрэрэ киһини сөхтөрөр.
Төрдүс түһүмэҕи олус интэриэһинэй түһүмэх дии санаатым. Бу түһүмэххэ кыргыттарбыт авангард стиилинэн Олоҥхо дьоруойдарын уобарастарын көрдөрдүлэр. Ол курдук, Удаҕан, Аан Алахчын, Абааһы, Дьөһөгөй, Кыыс Бухатыыр, Кыыс Кыталык курдук толору сиппит ураты көстүүлээх таҥастары-саптары көрдүбүт.
Уонна бүтэһик түһүмэххэ кыргыттар киэһээҥҥи былааччыйалары кэтэн, симэнэн хааман көрдөрдүлэр.
Түмүккэ, Анжелика Назарова бэрэссэдээтэллээх Дьүүллүүр Сүбэ “Мисс-Горный” кыайыылааҕынан Милена Данилованы ааттаата. Ону тэҥэ, кини “Мисс Харизматичность” анал ааты ылла уонна ONNI корейскай косметика хампаанньа анал бирииһин тутта. “Вице-Мисс Горный” уонна “Мисс Очарование” Бэрдьигэстээх С.Данилов аатынан оскуола 11-с кылаас үөрэнээччитэ Сандаара Терентьева буолла. Куоластааһын түмүгүнэн “Мисс Интернет” уонна “Мисс Обаяние” анал ааттары Милена Богданова ылыан ылла. Сандра Заубер – «Мисс Грация», Диана Стручкова – «Мисс Вдохновение», Дайана Сивцева – «Мисс Элегантность», Уруйдаана Чемезова – «Мисс Талант» буоллулар.
Кэрэ биэчэри бэйэбит оскуолабыт үөрэнээччилэрэ, ырыаһыт кыргыттарбыт Эдита Антонова, Лариса Антонова, Женя Никифорова, Наталина Иванова, Сандаара Петрова олус киэргэттилэр.
«Мисс Горный – 2025» олус үрдүк таһымнаахтык ааста, сылтан сыл тупсан иһэр диэн сыаналаатыбыт.
Анастасия Слепцова, «Сайдам» медиакиин юнкора, С.П.Данилов аатынан Бэрдьигэстээх оскуолатын 11-с кылааһын үөрэнээччитэ