(Кэпсээн)
Бу сарсыарда хаар бөҕө түспүт. Мичиллэй аҕатын кытта бултуу барсар буолбут. Аҕата хаһан эрэ элбэх хаар түстэҕинэ барсаар диэн эрэннэрбитэ. Онон Мичиллэй элбэх хаар түһэрин, бу күнү кини өр да өр күүттэ. Аҕалара эрдэ туран оһоҕун отунна, таһырдьа үлэ-хамнас буолла. Ийэлэрэ сарсыарда алаадьы астаабытыгар дьиэ иһэ минньигэс да сытынан дыргыйда. Мичиллэй хойут турар бэйэтэ бу күн эрдэ турда. Кини өйө-санаата барыта ойуур. Бэл, ардыгар ойуурга сылдьарын түүлүгэр кытта түүһээччи. Дьиэлээхтэр остуол тула олорон чэйдииллэр. Оһох тыаһа «тыс-тас» гынан үөрбүттүү умайар. Мичиллэй төп-төгүрүк хараҕынан кылап гына-гына сып-сылаас алаадьыны мотуйар, олоппоско олорон үөрүүтүттэн атахтарын салгыҥҥа хамсатан ылар. «Оҕом, үчүгэйдик, сэрэнэн сырыт» диэн баран ийэтэ Мичиллэйи сүүһүттэн сыллаан ылар.
Онтон аҕатын кытта хомунан тыаҕа туруннулар. Мичиллэй аҕатын кэнниттэн батыһан иһэр. Аҕатын улахан улахан хардыыларын ситээри ыстаҥалаан ылар. Уолчаан хааман иһэн тулатын көрөр. Кыһын чугаһаан иһэр буолан туох барыта иһийэн, чуумпуран туран. Айылҕа мап-маҥан, сып-сырдык хаарынан бүрүллүбүтэ үчүгэйиин. Арай кини аҕатын кытта хаамалларыгар хаар эрэ хаачыргыыр.
Мичиллэй эмискэ ойуур диэки куобах ыстаҥалаан иһэрин көрө түстэ. Кинини тутаары кэнниттэн сүүрдэ. Ол сүүрэн иһэн мастан иҥнэн охтон түстэ. Куобаҕа ыраах ыраах ойо турда.Оо, Мичиллэй кыһыйда, абарда. Туран хаарын тэбинэн тула өттүн өйдөөн көрбүтэ, суолтан ыраатан хаалбыт эбит.
Кини муннум диэн наһаа куттаммыт, ыксаабыт. Тохтоон хайдах төннөрүн толкуйдаабыт. Үөһэ көрдө, туора көрдө. Онтон аллара көрбүтэ хаарга атаҕын суола сытар. «Ээ, кырдьык атаҕым суолун батыһыам», — дии санаата уонна атаҕын суолун батыһан барда. Тиийбитэ аҕата кэтэһэн бөҕө турар эбит. Онтон иккиэн туһахтарын көрөн, өттүк харалаах, илии тутуурдаах дьиэлэригэр киэһэ буолуута тиийдилэр. Ити курдук, Мичиллэй уол хаарга бэйэтин суолунан сирдэтинэн мумматах.
keskil14.ru