Биһиги нэһилиэкпит баһылыгынан быйыл норуот итэҕэлин хаһыс да төгүлүн ылан салгыы Егор Иннокентьевич Павлов үлэлиир. Кини солбуйааччытын Петр Гаврильевич Егоровы кытта кэпсэттим. Быйылгы кэпсэтии кыстыкка киирии, от оттооһуна, эдэр ыаллар уонна куруук буоларыныы инники былааннар тустарынан буолла.
— Үтүө күнүнэн, Петр Гаврильевич! Билигин биһиги нэһилиэкпитигэр хас киһи олороруй? Онтон эдэр ыала төһөнүй? Оҕо ахсаана төһө эбиллэрий?
7507 киһи олорор. Сыл аайы 100 тахса оҕо төрүүр. Сылын аайы нэһилиэнньэ эбиллэр. Эдэр специалистар, ыаллар көһөн кэлиилэрэ бэлиэтэнэр.
— Эдэр ыалларга туох анал бырагыраамма үлэлиирий?
Молодая семья бырагыраама чэрчитинэн уочаракка туран дьиэ туттуутугар субсидия ылаллар, эдэр специалистарга эмиэ көмө барар.
— Нэһилиэкпитигэр төһө ыал ынах –сүөһүнү иитэргэ кэтэх хаһаайыстыба тутан олороруй? Төһө от оттонно?
— Урукку курдук элбэх буолбатах. Уопсайа 118 хаһаайыстыба баар. Ол эрэн эдэр ыаллар кэлин ынах-сүөһүнү иитэргэ тэринэн эрэллэрэ үөрдэр. Билигин кэтэх дьон ынаҕын ылан иитэр хаһаайыстыбалар баар буоллулар. Олох тэтимэ түргэн, үлэлээх дьон онно туттаран бараннар оттоон биэрэллэр, ким этинэн-үүтүнэн, харчынан төлөһөллөр. Бу ньыма улууска тарҕанан билигин биһиги нэһилиэкпитигэр эмиэ баар буолла. Оттооһун нэһилиэк үрдүнэн 80% туолла. Нэһилиэкпитигэр олох сир тиийбэт. Оттуур сири дьон Дьохсоҕон нэһилиэгэр арендалаан оттууллар.
— Уопсайынан кыстыкка бэлэм хайдаҕый?
— Кыстыкка бэлэм кэминэн. Котельнайдар бары үлэлии тураллар. Биһиэхэ ОдьКХ эрэ буолбакка чааһынай 3 модульнай котельнайдар тутуллан үлэлииллэр. Инньэ гынан, 70% дьиэлээх ыалларбыт отоплениеҕа холбонон олороллор. Кытыы ыаллар хааллылар.
— Кэлэр 2026 сылга туох үлэ былааннанарый?
ППМИ бырагырааманан кыттан эбии тратуар, ремонт, уот киириитэ былааннанар уонна саҥа эбийиэктэр киириилэрэ күүтүллэр: “Благоустройство” чэрчитинэн Дмитриан Попов сквера уонна күүтүүлээх библиотека дьиэтэ бүтүөхтээх. Салгыы хаарбах дьиэлэртэн көһөрүү бырагырааммата үлэлээн 3 дьиэ тутуллара былааннанар.
— Петр Гаврильевич, ыйытыылдарбар эппиэттээбиккэр махтал!
—
Алеша Саввин, 9 «Б» кылаас,
А.Е.Мординов аатынан лиссиэй юнкора,
Ытык Күөл, Таатта